सांडपाणी वाहिनीमुळे लोहगावातील नागरिक हैराण

लोहगाव, ता. १७ : लोहगावातील संत तुकाराम महाराज मंदिर परिसरात अनेक दिवसांपासून सांडपाणी वाहिनीचे काम सुरू आहे. यासाठी परिसरातील रस्ता खोदण्यात आला होता. मात्र अनेक दिवस उलटूनही याचे काम रखडलेले असून खोदलेला रस्ताही तसाच असल्याने नागरिक हैराण झाले आहेत.
काम सुरू असल्याने या रस्त्याची वाहतूक पूर्णपणे बंद आहे. त्यामुळे नागरिकांना पर्यायी रस्त्याचा वापर करावा लागतो. मात्र त्या रस्त्याच्या बाजूलाच कुंभारवाडा आहे. संक्रांतीनिमित्त विक्रीसाठी खण आणि इतर वस्तू घेऊन जाताना येथील नागरिकांना चांगलीच कसरत करावी लागली. काम सुरू असताना नागरिक सहकार्य करतात, मात्र अनेक दिवसांपासून काम बंद असल्याने संताप व्यक्त केला जात आहे. प्रशासनाने यावर लवकरात लवकर तोडगा काढून बंद असलेले काम पूर्ण करावे अशी मागणी नागरिक करत आहेत.

याबाबत मला पूर्ण माहिती नाही. संबंधित अधिकाऱ्यांशी बोलून लवकरात लवकर काम सुरू करण्यास सांगतो.
- जगदीश खानोरे, मुख्य अभियंता मलनिःसारण विभाग

वाहने आत जात नसल्याने विक्रीसाठी घेऊन जाणारा माल मनुष्यबळाने घेऊन जावा लागतो. त्याकरिता अनावश्यक वेळ आणि मेहनत वाया जाते.
- गणेश कुंभार, स्थानिक व्यापारी