Wagholi Metro: CM शिंदेंचं पुणेकरांना गिफ्ट ! वनाज ते चांदणी चौक आणि रामवाडी ते वाघोली मेट्रो मार्गाला मंजुरी

पुणे - वनाज ते रामवाडी मार्गावर वनाज ते चांदणी चौक आणि रामवाडी ते वाघोली या नव्या विस्तारीत एलिव्हेटेड मेट्रो मार्गांना मुख्यमंत्री एकनाथ शिंदे यांच्या अध्यक्षतेखाली झालेल्या मंत्रिमंडळाच्या बैठकीत या प्रकल्पांना सोमवारी मंजुरी देण्यात आली. आता केंद्र सरकारने परवानगी दिल्यावर या विस्तारीत मेट्रो मार्गांवर काम सुरू होईल.

वनाज- रामवाडी हा १६ किलोमीटरचा मेट्रो मार्ग आता कार्यान्वित झाला आहे. या मार्गावर रुबी हॉल क्लिनिक ते रामवाडी दरम्यानच्या मेट्रो मार्गाचे पंतप्रधान नरेंद्र मोदी यांच्या हस्ते ६ मार्च रोजी उदघाटन झाले. आता या मार्गावर विस्तारीत मेट्रो मार्गांना परवानगी देण्यात आली आहे. त्यासाठी ३ हजार ७५६ कोटी ५८ लाख रुपये खर्च होणार आहे.

राज्य सरकार, केंद्र सरकार आणि कर्ज, या माध्यमातून या निधीची उभारणी होणार आहे. राज्य सरकारने या प्रस्तावाला मंजुरी दिल्यामुळे आता केंद्र सरकारच्या पब्लिक इनव्हेस्टमेंट बोर्ड (पीआयबी) यांच्यापुढे या प्रकल्पाचे सादरीकरण होईल. तेथे मंजुरी मिळाल्यावर हा प्रकल्प रेल्वेखात्यामार्फत केंद्र सरकराच्या मंत्रिमंडळापुढे अंतिम मंजुरीसाठी पोचेल. त्यानंतर मंजुरी मिळाल्यावर प्रत्यक्ष कामाला प्रारंभ होईल.

- वनाज ते चांदणी चौक - अंतर १.१२ किलोमीटर - २ स्थानके होणार

- रामवाडी ते वाघोली - अंतर ११.६३ - किलोमीटर - ११ स्थानके होणार

‘शहराचा औद्योगिक विकास आणि विस्तारही वेगाने होत आहे. वाढत्या लोकसंख्येला पर्यावरणपूरक सार्वजनिक वाहतूक सुविधा देण्याचा आमचा प्रयत्न आहे. नव्या विस्तारीत मेट्रो मार्गांमुळे उपनगर शहराशी जोडले जाईल,’.

- उपमुख्यमंत्री, अजित पवार