संस्कार फाउंडेशनतर्फे निराधारांना ब्लॅंकेट

मंचर, ता. ४ : सध्या वाढलेल्या थंडीच्या कडाक्याने मंचर शहर व परिसरात उघड्यावर, तपनेश्वर मंदिरांच्या प्रांगणात, स्मशानभूमी, बसस्थानक व उपजिल्हा रुग्णालय परिसरात अनेक जण थंडीने कुडकुडताना दिसून येत आहेत. अंगावर पांघरूण नसल्याने काही जणांनी चक्क फ्लेक्सचे कापड अंगावर घेऊन रात्र काढत असल्याचे हृदयद्रावक चित्र पाहायला मिळाले.
या पार्श्वभूमीवर मंचर येथील संस्कार फाउंडेशनने माणुसकीचा उबदार स्पर्श देत निराधारांसाठी आधाराचा हात पुढे केला. फाउंडेशनचे संस्थापक अजय घुले व त्यांच्या सहकाऱ्यांनी शुक्रवारी (ता. २) रात्री ठिकठिकाणी जाऊन ३१ गरजू व्यक्तींना ब्लँकेटचे वाटप केले.
या सामाजिक उपक्रमात डॉ. ओंकार काजळे, जितेंद्र खरमाळे, महेश बढे यांच्यासह संस्कार फाउंडेशनचे अन्य सदस्य सहभागी झाले होते.