मेट्रोच्या कामासाठी कल्याणीनगरमधील भुयारी मार्ग बंद

पुणे : मेट्रो प्रकल्पाचे काम सुरू असल्याने कल्याणीनगर येथील भुयारी मार्ग वाहतुकीसाठी पुढील एक महिना बंद ठेवण्यात येणार आहे. त्यामुळे कल्याणीनगरहून विमानतळ व विमानतळ रस्त्यावरुन कल्याणीनगर परिसराकडे जाणारी वाहतुक पर्यायी मार्गाने वळविण्यात आली आहे. त्यामुळे वाहनचालकांनी पर्यायी मार्गाचा वापर करावा, असे आवाहन वाहतुक पोलिसांनी केले आहे.(Pune Metro Work)

मेट्रो प्रशासनाकडून कल्याणीनगर ते रामवाडी जकात नाका परिसरात मेट्रोचे सहा खांब उभे करण्यात येणार आहेत. त्यामुळे कल्याणीनगरमधील भुयारी मार्ग वाहतुकीस बंद ठेवण्यात येणार आहे. एक महिना हे काम सुरु राहणार असून 28 फेब्रुवारीपर्यंत भुयारी मार्ग वाहतुकीसाठी बंद असणार आहे, असे वाहतुक शाखेचे पोलिस उपायुक्त राहुल श्रीरामे यांनी सांगितले आहे.विमानतळ रस्त्याने कल्याणीनगरकडे, तसेच कल्याणीनगरहून विमानतळ रस्त्याकडे ये-जा करणारी वाहतूक पर्यायी मार्गाने वळविण्यात येणार आहे.

वाहनचालकांसाठी पर्यायी मार्ग पुढीलप्रमाणे- विमानतळाकडून कल्याणीनगरकडे जाणाऱ्या वाहनांनी भुयारी मार्गाजवळून डावीकडे वळावे. वडगाव शेरी चौकातून पुन्हा कल्याणीनगरकडे वळावे. कल्याणीनगरहून विमानतळाकडे जाणाऱ्या वाहनांनी साऊथ एव्हेन्यू आणि सेंट्रल एव्हेन्यू रस्त्याने कल्याणीनगर चौकातून उजवीकडे वळून विमानतळाकडे जावे.