मनसेकडून शिवजयंती उत्साहात! अमित ठाकरे शिवनेरीवर

राज्यभरात उत्साहात आणि मोठ्या धुमधडाक्यात तिथीनुसार शिवजयंती साजरी करा असं आवाहन मनसेचे सर्वेसर्वा राज ठाकरे यांनी केलं होतं. त्यानुसार आज मनसेकडून राज्यभरात शिवजयंती उत्साहात साजरी केली जातेय. राज ठाकरेंचे पुत्र आणि मनसेचे युवा नेते अमित ठाकरे हे स्वत: आज शिवजयंती निमित्त शिवनेरी गडावर दाखल झाले आहेत.

शिवनेरीवर आज मनसेकडून वेगवेगळ्या कार्यक्रमांचं आयोजन केलं गेलं आहे. सकाळी ७ च्या सुमारासच अमित ठाकरे हे शिवनेरीवर दाखल झाल्याची माहिती मिळतेय. यावेळी ढोल ताशांचा, शिवगर्जनांचा गजर गडावर सुरु असल्याचं पाहायला मिळालं. तर राज्यभरातून शिवप्रेमी याठिकाणी दाखल झाल्याचीही माहिती मिळतेय. या अनुषंगाने गडावर पोलिसांचा मोठा फौजफाटा तैनात करण्यात आला आहे.

अमित ठाकरे यांच्या हस्ते शिवाई देवीच्या मंदिरात पुजन करण्यात आलं. यावेळी शेकडो मनसैनिक आणि शिवप्रेमी गडावर हजर आहेत.