मनसेच्या इंजिनला चावी मिळणार; पुण्यात असणार 'हे' उमेदवार

पुणे : विधानसभा निवडणुकीत सर्व पक्षाची जागा वाटपाबाबत चर्चा सुरू आहे. मात्र मनसेच्या इंजिनला आज (गुरुवार) चावी मिळणार असल्याने कार्यकर्ते आदेशाची वाट पाहत आहेत. आज मनसेची भूमिका स्पष्ट होणार असल्याचं सूत्रांनी सांगितले आहे.

पुण्यातील कसबा, हडपसर, शिवाजीनगर विधानसभा मतदारसंघातून आज उमेदवार जाहीर होतील अशी माहिती मिळत आहे. मनसे जिल्ह्यात नवीन चेहेरे देईल कारण इतर पक्षाचे अनेक कार्यकर्ते मनसेच्या संपर्कात असून त्यांनी मनसे नेत्यांच्या भेटी घेतल्या आहेत. जिल्ह्यातील शिरूर, खडकवसाला, पुरंदरपैकी एक जागा मनसे लढणार आहे. जिल्ह्यातील शिवसेनेचा एक मोठा नेता मनसेच्या संपर्कात असून खडकवासला मतदारसंघ जर सेनेला सुटला नाही, तर मनसेचे तयारी या नेत्याने ठेवली आहे.
आज पुण्यातल्या जागा जाहीर होतील असा अंदाज आहे. नेत्यांना दोन जागांवर तयारी करायला लावली आहे.

लोकसभा निवडणुकीतून माघार घेतल्यानंतर आता विधानसभा निवडणूक लढवण्यासाठी महाराष्ट्र नवनिर्माण सेनेच्या कार्यकर्त्यांनी कंबर कसली आहे. लोकसभा निवडणुकीच्या प्रचारात 'लाव रे तो व्हिडिओ'च्या माध्यमातून राज्यभर घेतलेल्या झंझावाती सभांना मोठा प्रतिसाद मिळाला. विरोधी पक्षांच्या तुलनेत मनसेने नरेंद्र मोदी, अमित शहा आणि भाजपवर जोरदार हल्ला चढवल्याने कार्यकर्त्यांचा हुरूप वाढला होता. मनसेची ताकद असलेल्या प्रामुख्याने कोथरूड, हडपसर, शिवाजीनगर आणि कसबा या चार मतदारसंघात जोरदार लढा देण्याचे पक्षाचे नियोजन आहे. कसबा मतदारसंघातून रूपाली पाटील,  हडपसरमधून वसंत मोरे, यांच्या नाव आज जाहीर होऊ शकते. मात्र, इंजिनला राजसाहेबांचा आदेशाची चावी आज मिळेल हे निश्चित होईल

असे असतील उमेदवार
कसबा - रुपाली पाटील 
हडपसर - वसंत मोरे 
पुरंदर - बाबा जाधवराव