पुणे : दारू पिताना झाला वाद; लोखंडी शस्त्राने वार करून केली हत्या

पुणे : दारू पिताना शिवीगाळ केल्याच्या रागातुन चौघानी तरुणावर धारदार लोखंडी शस्त्राने वार करुन खुन केला. हि घटना सोमवारी रात्री साडे बारा वाजण्याच्या सुमारास दत्तवाड़ी येथे घडली. मंदार जोगदंड (वय 23, रा. साने गुरुजी वसाहत, आंबिलओढा) असे खुन झालेल्या तरुणाचे नाव आहे. सोन्या खुळे,राजू कोतवाल, साहिल इजगद, चेतन बनसोडे( सर्व रा. दत्तवाड़ी) असे गुन्हा दाखल झालेल्याची नावे आहेत. याप्रकरणी शुभम दत्ता अडसुळ (वय 23, रा. अप्पर इंदिरानगर) यांनी फिर्याद दिली आहे.

पोलिसांनी दिलेल्या माहितीनुसार, जोगदंड व खुळे हे दोघेही एकमेकांच्या ओळखीचे आहेत. सोमवारी रात्री ते दोघे व खुळे याचे साथीदार दत्तवाड़ी येथील सई हेरिटेज सोसायटीजवळ दारू पित बसले होते. त्यावेळी जोगदंड याने खुळे यास शिवीगाळ केली. त्याचा राग आल्याने जोगदंडवर खुळे व त्याच्या साथीदारांनी धारदार लोखंडी शस्त्राने वार केले. तसेच त्यांना बेदम मारहाण केली. या घटनेत जबर दुखापत झाल्याने जोगदंडला रुग्णालयात दाखल करण्यात आले, मात्र उपचारापूर्वीच मृत्यु झाला. या प्रकरणाचा तपास सहायक पोलिस निरीक्षक युवराज पाटील करीत आहेत.