नारायण राणे यांच्या टीकेवर अजित पवारांची प्रतिक्रिया

पुणे- अजित पवार अज्ञानी आहेत, त्यांनी स्वत:च्या खात्याचं पाहावं अशी बोचरी टीका केंद्रीय मंत्री नारायण राणे यांनी केली होती. यावर पुण्याचे पालकमंत्री अजित पवार यांनी प्रतिक्रिया दिली आहे. मला या गोष्टीची चर्चा करायची नाही. त्याचं त्याला लखलाभ. ते केंद्रात मंत्री आहेत, त्यांनी त्यांचं काम करावं, आम्ही आमच्या राज्यातील काम करत राहू, असं ते म्हणाले आहेत. अजित पवारांच्या नेतृत्त्वातील पुण्यातील बैठक संपली आहे. यावेळी माध्यमांशी बोलताना त्यांनी विविध विषयांवर प्रतिक्रिया दिली.

रुग्णसंख्या वाढत असल्याने केंद्र सरकार राज्याला काळजी घेण्यास सांगत आहे. पण, दुसरीकडे चार मंत्र्यांना जन आशीर्वाद यात्रा काढण्यात सांगितलंय. अशा यात्रांना गर्दी होत आहे. त्यामुळे अशा ठिकाणी कोरोना वाढण्याचा धोका आहे. या ठिकाणी रुग्ण वाढू नये अशी आमची आशा आहे, पण रुग्ण वाढले तर त्याला जबाबदार कोण याचा विचार केंद्र सरकारने करायला हवा, असं अजित पवार म्हणाले आहेत.

मला अनिल देशमुखांबाबत रिपोर्ट मिळत नाही. तोपर्यंत मी यावर बोलणार नाही, अनेक चौकशा होत असतात. त्यावेळी सगळ्यानी चौकशीसाठी मदत करत असतात, त्यामुळे यावर बोलणार नाही, असं अजित पवार म्हणाले. जिथं राजकारण करायच आहे, तिकडे सगळे राजकारण करू. पण जिथं जनतेचा प्रश्न तिकडे सर्व राजकिय पक्षानी एकत्र काम केलं पाहिजे त्यामुळे सण साजरे करताना काळजी घ्यावी, असं आवाहन पवारांनी केलं.

दरम्यान, पुण्यात पीएमआरडी बाबत बैठक पार पडली. यावेळी पालकमंत्री म्हणाले की, ''आज खासदार आमदारांना एक ड्राफ्ट दाखवला. अनेकांनी सूचना दिल्या. एक बैठक मुख्यमंत्री स्तरावर होणार आहे. त्यानंतर त्यातील अनेक मागण्या बाबत चर्चा होईल. पुणे आजूबाजूचा परिसर वाढतच आहे. त्यामुळं भविष्यात जर नवीन महापालिका करायची झाली तर त्याबाबत नियोजन करायच त्याबाबत चर्चा झाली.''