PMPML Bus Accident : पीएमपी बसचे स्टेअरिंग तुटल्याने अपघातात नऊजण जखमी

पुणे : पीएमपी बसच्या स्टेअरिंगचा लोखंडी दांडा तुटल्यामुळे झालेल्या अपघातात महाविद्यालयीन विद्यार्थ्यांसह नऊ प्रवासी किरकोळ जखमी झाले. राहू-वाघोली रस्त्यावरील सांगवी फाटा परिसरात सोमवारी सकाळी हा अपघात झाला.

पुणे स्टेशन ते पारगाव मार्गावरील पीएमपी बसमधून विद्यार्थ्यांसह अन्य नागरिक प्रवास करीत होते. सांगवी फाटा परिसरात पीएमपी बसच्या स्टेअरिंगचा लोखंडी दांडा तुटला. त्यामुळे पीएमपी बसचालकाचे नियंत्रण सुटले. बस रस्त्याच्या कडेला असलेल्या खड्ड्यात गेल्यामुळे प्रवासी जखमी झाल्याची माहिती लोणीकंद पोलिसांनी दिली.