पाटसमध्ये ओबीसी मोर्चेकऱ्यांना रोखले

कानगाव/पाटस, ता. १ : ओबीसी नेते लक्ष्मण हाके यांच्या नेतृत्वाखाली मुंबईच्या दिशेने निघालेल्या ‘महा एल्गार मोर्चा’ला पाटस (ता. दौंड) टोलनाका येथे पोलिसांनी अडविल्याने काही काळ तणावाचे वातावरण निर्माण झाले. मोर्चाला परवानगी नसल्याचे पोलिसांनी सांगितल्यानंतर मोर्चेकरी सुमारे अडीच ते तीन तास टोलनाका परिसरात खोळंबले. हाके यांच्या नेतृत्वाखाली आंदोलकांनी पुणे- सोलापूर महामार्गावर ठिय्या आंदोलन केल्याने वाहतुकीवरही परिणाम झाला.
पाटस टोलनाका येथे सकाळी साडेदहा वाजण्याच्या सुमारास विविध जिल्ह्यांतून आलेले मोर्चेकरी दाखल झाले. मुंबईच्या दिशेने पुढे जाण्याचा प्रयत्न केला असता पोलिसांनी त्यांना अडविले. त्यामुळे हाके यांनी महामार्गावरच ठिय्या आंदोलन सुरू केले. मोठ्या संख्येने मोर्चेकरी एकत्र आल्याने टोलनाका परिसरात गर्दी झाली. दरम्यान, राज्यातील विविध जिल्ह्यांतून मोर्चासाठी मुंबईच्या दिशेने येणाऱ्या ओबीसी समाजबांधवांना पोलिसांकडून त्यांच्या ठिकाणावर अडवून ठेवण्यात येत असल्याचा आरोप हाके यांनी केला. तसेच, अडवून ठेवण्यात आलेली मोर्चेकऱ्यांची वाहने सोडण्यात यावीत, अशी मागणी आंदोलकांनी केली. अडविलेल्या वाहनांना पुढे जाण्याची परवानगी मिळेपर्यंत रस्ता मोकळा करणार नसल्याची भूमिका आंदोलकांनी घेतली. त्यामुळे काही काळ पुणे-सोलापूर महामार्गावरील वाहतूक विस्कळित झाली.
परिस्थिती नियंत्रणात ठेवण्यासाठी पाटस टोलनाका परिसरात मोठा पोलिस बंदोबस्त तैनात करण्यात आला. त्यामुळे परिसराला पोलिस छावणीचे स्वरूप आले होते. परिस्थितीचे गांभीर्य लक्षात घेऊन पुणे ग्रामीणचे पोलिस अधीक्षक संदीपसिंग गिल यांनी पाटस येथे भेट दिली. त्यांनी मोर्चेकरी व आंदोलकांशी संवाद साधून परिस्थिती शांत करण्याचा प्रयत्न केला. मात्र, मोर्चेकऱ्यांना पुढे जाण्याची परवानगी देण्यात आली नाही. अंदाजे अडीच ते तीन तासांच्या ठिय्यानंतर दुपारी दीडच्या सुमारास आंदोलकांनी महामार्गावरील रस्ता खुला केला. त्यानंतर मोर्चेकरी पुण्याच्या दिशेने मार्गस्थ झाले. रस्ता खुला झाल्यानंतर महामार्गावरील वाहतूक हळूहळू सुरळीत झाली. कोणताही अनुचित प्रकार घडू नये, यासाठी पोलिसांनी परिस्थितीवर बारकाईने लक्ष ठेवले.

पाटस (ता. दौंड) : टोल नाका येथे भर रस्त्यावर ठिय्या मांडून म्हणून बसलेले मोर्चेकरी.