पुणे : चंदन तस्करी प्रकरणात एकास पकडले

पुणे : चंदनाच्या लाकडांची तस्करी करणाऱ्यास खंडणी विरोधी पथकाने अटक केली. पोलिसांनी त्याच्याकडून 102 किलो वजनाचे ओल्या चंदनाच्या लाकडाचे तुकडे, कार असा साडे पाच लाख रुपयांचा ऐवज जप्त केला.लक्ष्मण भीमा गायकवाड (वय 42 , रा. तरडोबाचीवाडी, शिरूर) असे अटक केलेल्याचे नाव आहे. खंडणी विरोधी पथकातील कर्मचारी नगर रस्ता भागात गस्त घालत होते. त्यावेळी पेरणे फाटा परिसरातून कारमधुन निघालेल्या एका व्यक्तीकडे चंदनाच्या लाकडाचे तुकडे असल्याची खबर पोलिसांना मिळाली.(sandalwood smuggling case)

त्यानुसार, पोलिसांनी संबंधीत कार अडविण्याचा प्रयत्न केला. त्यावेळी कार चालकाने पोलिसांना पाहून कार घेऊन पळ काढण्याचा प्रयत्न केला. त्यावेळी पोलिसांनी त्यास पाठलाग करुन पकडले. पोलिसांनी त्याच्या गाडीची तपासणी केली, त्यावेळी त्यामध्ये 102 किलो वजनाचे ओल्या चंदनाच्या लाकडाचे तुकडे पोलिसांना आढळून आले. पोलिसांनी ते जप्त केले. गायकवाड हा चंदनाची झाडे कापून नेणाऱ्या चोरट्यांकडून चंदनाची लाकडे विकत घेतो, त्यानंतर त्या चंदनाची तस्करी करीत असल्याचा पोलिसांना संशय आहे. हि कारवाई पोलिस निरीक्षक बालाजी पांढरे, सहाय्यक पोलिस निरीक्षक लक्ष्मण ढेंगळे, राहुल उत्तरकर, विजय गुरव, प्रदीप शितोळे, शैलेश सुर्वे यांच्या पथकाने केली.(pune news)