पुणे : मित्र हरवल्याची तक्रार दयायला गेले आणि समजले की, तो गेला!

पुणे : खासगी कंपनीमध्ये पायी जाणारी एक व्यक्ती दोन ते तीन दिवस घरी परतली नाही. त्यामुळे त्या व्यक्तीचे मित्र तो हरवल्याची तक्रार देण्यासाठी विमानतळ पोलिस ठाण्यात दाखल झाले. तेव्हा पोलिसांनी त्यांना अपघातात मृत्यू झालेल्या व्यक्तीचा फोटो दाखविला. त्यावेळी मृत व्यक्ती आपला मित्रच असल्याचे त्यांनी सांगितले आणि मृताची ओळख पटली. 

ताज्या बातम्यांसाठी डाऊनलोड करा ई-सकाळचे ऍप
 

मंतू अमूल्य प्रमाणिक (वय 51) हे खासगी कंपनीमध्ये कामाला होते. रविवारी 23 ऑगस्ट रोजी सकाळी दहा वाजता ते काही कामानिमित्त विमाननगर येथील एका महाविद्यालयासमोरुन पायी बाहेर जात होते. त्यावेळी पाठीमागून भरधाव आलेल्या दुचाकीस्वाराने त्यांना जोरदार धडक दिली. या अपघातात प्रमाणिक खाली पडल्याने त्यांच्या डोक्‍याला व शरीरावर गंभीर दुखापत झाल्याने त्यांना ससून रुग्णालयात पाठविण्यात आले. मात्र, तेथे त्यांना मृत्यू घोषित करण्यात आले. मात्र, विमानतळ पोलिसांना अपघातातील मृताविषयीची माहिती मिळत नव्हती.

जगभरातील इतर बातम्या वाचण्यासाठी येथे क्लिक करा

दरम्यान, 26 ऑगस्टला गौतम सहा व त्यांचे सहकारी विमानतळ पोलिस ठाण्यात त्यांचे मित्र मंतु प्रमाणिक हे हरवले असल्याची खबर देण्यासाठी आले होते. त्यावेळी पोलिसांनी त्यांना अपघातात मृत्यू झालेल्या व्यक्तीचे फोटो दाखविले. तेव्हा, संबंधीत मृत व्यक्ती ही आपला मित्र मंतु प्रमाणिक असल्याचे सहा यांनी पोलिसांना सांगितले. त्यामुळे मृत व्यक्तीची ओळख पटली. या प्रकरणाचा तपास विमानतळ पोलिस ठाण्याचे सहायक पोलीस निरीक्षक आर. ए. पाटील अधिक तपास करीत आहेत.
 

देशभरातील इतर बातम्या वाचण्यासाठी येथे क्लिक करा