सोलापूरला लग्नसमारंभासाठी निघालेल्या टेम्पोचा अपघात; 1 ठार, 6 जखमी

पाटस ःपुणे सोलापुर महामार्गाने सोलापुरला लग्न समारंभासाठी कुटुंबातील व्यक्तींना घेऊन निघालेल्या टेंपोची पाटस (ता. दौंड) हद्दीत रस्त्यात उभ्या असलेल्या ट्रकला जोराची धडक बसली. या अपघातात एका युवकाचा मृत्यू तर सहा जण जखमी झाले. रविवारी (ता. १६) पहाटे हा अपघात झाला. सइद शिराज शेख (वय १९) रा. अप्पर सरगमचाळ पुणे असे मृत असलेल्या युवकाचे नाव आहे. तर शबाना भेळमे (वय ४०), नबी भेळमे (वय १६), पैगंबर भेळमे (वय १३) सर्व रा. भवानी पेठ पुणे तसेच तफिसा शेख, समिरा शेख, महेक शेख (सर्व रा. पुणे) अशी जखमी झालेल्यांची नावे आहेत.

या बाबत टेंपो चालक अमिन मुजावर यांनी यवत पोलिसात फिर्याद दिली. त्यानुसार पोलिस उपनिरीक्षक संजय नागरगोजे यांनी माहिती दिली. चालक अमिन पुणे-सोलापुर महामार्गाने टेंपोतून वरील लोकांना घेवून लग्नासाठी सोलापुरला चालला होता. रविवारी पहाटे पाटस हद्दीतील घाटात अंधारात भररस्त्यात एक ट्रक उभा होता. ट्रक न दिसल्याने टेंपो थेट ट्रकच्या पाठीमागे धडकला. या अपघात टेंपोचे मोठया प्रमाणात नुकसान होवून त्यामधील सर्व जण जखमी झाले.

माहीती मिळताच यवत पोलिस ठाण्यातील उपनिरीक्षक संजय नागरगोजे, पोलीस नाइक सुधीर काळे, घनशाम चव्हाण, विजय भापकर, निखील अवचट, मधुकर म्हस्के, अनिकेत म्हस्के, बाळासाहेब चोरमले, दादाराम बाबर आदींनी घनास्थळी धाव घेतली. यावेळी जखमी हे वेदनेने विवळत पडले होते. पोलिसांनी तत्काळ पाटस टोल नाक्यावरील रु्ग्णवाहीका बोलावून घेतली. जखमींना उपचारासाठी दवाखान्यात हलविले. यावेळी उपचार दरम्यान सइद शेख हे मृत झाले.दरम्यान, रस्त्यावर सुरक्षतेच्या दृष्टीकोनातून ट्रक चालकाने कोणतीच खबरदारी घेतली नव्हती. बेजाबदार ट्रक उभा करुन अपघातास निमंत्रण दिल्याने पोलिसांनी ट्रक चालकास ताब्यात घेतले. या प्रकरणी पुढील तपास पोलिस उपनिरीक्षक संजय नागरगोजे करीत आहे.