बांधकाम व्यावसायिक खंडणी प्रकरणीआरोपींना पुन्हा कोठडी देण्याची पुनर्विचार याचिका फेटाळली

पुणे : जमीन व दोन कोटी रूपयांच्या  खंडणीसाठी बलात्काराचा गुन्हा दाखल करून बांधकाम व्यावसायिकाला जिवे मारण्याची धमकी दिल्याप्रकरणातील आरोपींना पुन्हा पोलिस कोठडी देण्याबाबत कोथरूड पोलिसांनी दाखल केलेली पुनर्विचार याचिका सत्र न्यायालयाने फेटाळली आहे. सत्र न्यायाधीश  ए. व्ही. रोट्टे यांना हा आदेश दिला. 

ताज्या बातम्यासाठी डाऊनलोड करा ई-सकाळचे अॅप

पुण्याच्या बातम्या वाचण्यासाठी येथे क्लिक करा

याप्रकरणी बांधकाम व्यावसायिक सुधीर कर्नाटकी (वय 64, पौड रोड, कोथरूड) यांनी कोथरुड पोलिस ठाण्यात फिर्याद दाखल केली आहे. त्यावरुन दीप्ती आहेर (वय 34, रा. व्हीला विस्टा अपार्टमेंट, बावधन), माहिती अधिकार कार्यकर्ता रविंद्र लक्ष्मण बऱ्हाटे (रा. लुल्लानगर, कोंढवा), बडतर्फ पोलिस शैलेश हरिभाऊ जगताप (वय 49, रा. विश्वकर्मा इमारत, भवानी पेठ), अमोल सतीश चव्हाण (रा. चव्हाणवाडा, कोथरुड) आणि पत्रकार देवेंद्र फूलचंद जैन (वय, 52, प्रियदर्शनी सोसायटी, गणेशमळा, सिंहगड रोड) यांच्यावर गुन्हा दाखल आहे. जगताप, जैन आणि आहेर यांना या गुन्ह्यात अटक झाली होती. तर बऱ्हाटे आणि चव्हाण फरार आहेत. 

पुण्याच्या बातम्या वाचण्यासाठी येथे ► क्लिक करा

आरोपींची पोलिस कोठडीची मुदत संपल्यानंतर पोलिसांनी पुन्हा पोलिस कोठडी देण्याची मागणी केली होती. मात्र प्रथमवर्ग न्यायदंडाधिकाऱ्यांनी ही मागणी फेटाळून लावत आरोपींना जामीन मंजूर केला होता. त्यामुळे आरोपींचा जामीन रद्द करून त्यांना पुन्हा पोलिस कोठडी द्यावी, या मागणीसाठी कोथरुड पोलिसांनी सत्र न्यायालयात पुनर्विचार याचिका दाखल केली होती. मात्र न्यायालयाने ही याचिका फेटाळली. बचाव पक्षातर्फे ऍड. उज्वला पवार आणि विजयसिंह ठोंबरे यांनी युक्तिवाद केला.