Crime News : पेट्रोल भरण्यास उशीर झाल्यामुळे मालकास मारहाण

पुणे - दुचाकीत पेट्रोल भरण्यास उशीर झाल्यामुळे तिघांनी पेट्रोल पंपाच्या मालकासह कर्मचाऱ्यास मारहाण केल्याची घटना मंगला थिएटरजवळ पंपावर घडली. या प्रकरणी शिवाजीनगर पोलिसांनी एका अल्पवयीन मुलासह तिघांना चार तासांत ताब्यात घेतले.

या प्रकरणी नवनाथ कचरू काळे (वय २६) यांनी शिवाजीनगर पोलिस ठाण्यात फिर्याद दिली आहे. सुरजितसिंग युवराजसिंग जुनी (वय २४), जयसिंग जलसिंग जुनी (वय १९, दोघे रा. पाटील इस्टेट) अशी अटक केलेल्यांची नावे आहेत.

पोलिसांनी दिलेल्या माहितीनुसार, आरोपी महापालिका भवन परिसरातील मंगला थिएटरजवळ पंपावर पेट्रोल भरायला आले होते.

पेट्रोल भरण्यास उशीर झाल्यावरून आरोपी आणि कामगारांमध्ये बाचाबाची झाली. त्यावेळी दोघांनी कामगार नवनाथ काळे यांना मारहाण केली. त्यानंतर पुन्हा अर्ध्या तासाने जुनी आणि त्याचे साथीदार पेट्रोल पंपावर आले. त्यांनी पेट्रोल पंपावरील कार्यालयाची तोडफोड केली. पेट्रोल पंपाचे मालक सचिन शहा यांना बांबूने मारहाण करून जखमी केले. याबाबत माहिती मिळताच पोलिसांनी घटनास्थळी धाव घेतली.

पोलिस उपायुक्त संदीपसिंग गिल, सहायक आयुक्त वसंत कुंवर यांच्या सूचनेनुसार वरिष्ठ पोलिस निरीक्षक चंद्रशेखर सावंत, सहायक निरीक्षक बाजीराव नाईक, सविता सपकाळे, उपनिरीक्षक अजित बडे, पोलिस कर्मचारी रूपेश वाघमारे यांच्यासह अन्य कर्मचाऱ्यांनी आरोपींना ताब्यात घेतले.