वाघोलीतील आयटीआयचा वास्तूविशारद विभागाने तयार केला आराखडा

वाघोली (पुणे) : वाघोलीतील तीन एकर जागेतील प्रस्तावित हवेली तालुका आयटीआयचा बांधकाम आराखडा शासकीय वास्तूविशारद विभागाने तयार केला आहे. सार्वजनिक बांधकाम विभागाच्या इस्टीमेट, निधी उपलब्धता या प्रक्रियेनंतर प्रत्यक्ष बांधकामाला सुरुवात होईल. त्यासाठी चार ते सहा महिन्याचा कालावधी लागू शकेल.
हवेली तालुक्याचे आयटीआय अनेक वर्षांपासून पेरणे फाटा येथे भाडेतत्वावर घेतलेल्या जागेत  बिकट अवस्थेत सद्यस्थितीत चालू आहे. या आयटीआयसाठी 2013 मध्ये पुणे-नगर महामार्गालगत वाघोलीतील तीन एकर गायरान जागा जिल्हाधिकाऱ्यांच्या आदेशाने देण्यात आली.

तीस दिवसांच्या बाळाची झुंज यशस्वी; ससूनमध्ये उपचार

या जागेची मोजणी केली असता जागा कमी पडत होती. ही तीन एकर जागा मोजणी करून आयटीआयच्या ताब्यात देण्याचा प्रयत्न प्रशासनाने केला. मात्र, गार्डन, पंप हाऊस असल्यामुळे नागरिकांनी विरोध केला होता. नागरिकांचा विरोध पाहून जिल्हाधिकाऱ्यांनी इतर गायरान गटातील मिळून 3 एकर जागेचा ताबा आयटीआयकडे वर्षभरापूर्वी दिला. ही जागा मिळण्यासाठी आयटीआयचे प्राचार्य व वाघोलीतील आरटीआय कार्यकर्ते किशोर सातव यांनी सातत्यपूर्ण पाठपुरावा केला. शासकीय वास्तुविशारद विभागाने आयटीआयसाठी प्रस्तावित बांधकाम आराखडा तयार केला आहे. यामध्ये मुख्य शैक्षणिक इमारत, मुलांचे वसतीगृह, शिक्षकांसाठी रहिवासी इमारत प्रस्तावित करण्यात आले आहे.

पुण्याच्या बातम्या वाचण्यासाठी येथे  क्लिक करा

आराखड्याचे सार्वजनिक बांधकाम विभागाकडून इस्टीमेट तयार करून आयटीआयला सदर केले जाणार आहे. प्रशासकीय मान्यतेनंतर बांधकामासाठी राखीव डीपीडीसीच्या निधीतून कामाला सुरुवात होणार आहे. यासाठी 4 ते 6 महिन्यांचा कालावधी लागू शकतो. नुकतेच पुणे विभागाचे मुख्य वास्तुविशारद चेतन आकरे, सार्वजनिक बांधकाम विभागाचे उपअभियंता कुलकर्णी, वाघोलीचे मंडलाधिकारी किशोर शिंगोटे, आयटीआयचे प्राचार्य संतोष गोसावी, आरटीआय कार्यकर्ते किशोर सातव यांनी प्रस्तावित आराखड्यासह आयटीआयच्या जागेची पाहणी केली. बांधकाम सुरू झाल्यानंतर ते पूर्ण होण्यासाठी तीन वर्षाचा कालावधी लागेल. ही भव्य इमारत झाल्यानंतर विद्यार्थी, शिक्षक यांची चांगली सोय होणार असून वाघोलीच्या वैभवात भर पडेल.