प्लाझ्मा द्या, दोन हजार मिळवा

पिंपरी - कोरोना संसर्गाच्या रुग्णांना प्लाझ्मा थेरपी फायदेशीर ठरत असल्याने प्लाझ्माची मागणी वाढली आहे. त्यामुळे प्लाझ्मा दात्यांची संख्या वाढविण्यासाठी महापालिकेकडून दोन हजार रुपये प्रोत्साहनात्मक मदत दिली जाणार आहे, अशी माहिती महापौर उषा ढोरे यांनी दिली. सध्या खासगी रुग्णालयांमधील रुग्णांसाठी प्रत्येकी सहा हजार रुपये दराने प्लाझ्मा घ्यावा लागत आहे. त्याऐवजी आता महापालिकेच्या रक्तपेढीतून अशा रुग्णांनाही मोफत प्लाझ्मा पुरविण्यात येणार आहे, असेही त्यांनी सांगितले.

कोरोना संसर्ग झपाट्याने वाढत आहे. सार्वजनिक व खासगी रुग्णालयांमध्ये उपचार सुरू आहेत. त्यासाठी प्लाझ्माची मागणीही वाढली आहे. गंभीर रुग्णांवर उपचारांसाठी प्लाझ्मा थेरपीकडे एक आशेचा किरण म्हणून पाहिले जात आहे. त्यामुळे प्लाझ्मादात्यांची संख्या वाढविणे आवश्‍यक आहे. त्यासाठी प्लाझ्मादान करण्याचे आवाहन केले असून, दात्यांना प्रोत्साहनात्मक मदत देण्याचा निर्णय घेतला असल्याचे महापौरांनी सांगितले. सत्तारूढ पक्षनेते नामदेव ढाके म्हणाले, ‘कोरोनामुक्त व्यक्ती प्लाझ्मादान करू शकतात. मात्र, पुन्हा संसर्ग होईल या भीतीने प्लाझ्मा दात्यांची संख्या कमी झाली आहे. प्लाझ्मा किंवा प्लाझ्मा थेरपीसाठी दाता हवा आहे, असे असंख्य फोन आणि मेसेज येत आहेत. दरवर्षी उन्हाळ्यात रक्तदान मोहीम थंडावते. शिवाय कोरोना संसर्गामुळे रक्तदानाचे प्रमाण कमी झाले आहे. त्याचा फटका प्लाझ्मादानाला बसला आहे. शहरातील विविध सामाजिक संस्थांच्या वतीने आवाहन करूनही प्लाझ्मा देण्यासाठी फारसे लोक पुढे येत नसल्याने मोठ्या प्रमाणात तुटवडा जाणवत आहे. तो भरून काढण्यासाठी कोरोनामुक्त व्यक्ती व शहरातील विविध सामाजिक संघटनांनी कोरोनावर मात करण्यासाठी पुढाकार घेणे गरजेचे आहे.’