पुणे : मोदींचे वर्गमित्र हरीभाई शहा यांचा आठव्या मजल्यावरुन पडून मृत्यू

पुणे : गुजराती समाजातील ज्येष्ठ सामाजिक कार्यकर्ते हरीभाई शहा (वय 63) यांचा इमारतीच्या आठव्या मजल्यावरील एका सदनिकेच्या बाल्कनीतून खाली पडून गंभीर जखमी झाल्याने मृत्यू झाला. ही घटना सेनापती बापट रस्ता परिसरातील एका सोसायटीमध्ये घडली. दरम्यान, शहा हे पंतप्रधान नरेंद्र मोदी यांचे वर्गमित्र असल्याने मोदी यांचा त्यांच्याशी घनिष्ठ संबंध होता. 

शहा हे सॅलिसबरी पार्क येथील आनंद नगर परिसरामध्ये राहतात. शनिवारी दुपारी ते सेनापती बापट रस्त्यावरील पत्रकारनगर जवळ असलेल्या रोहन तपोवन या इमारतीमध्ये राहणाऱ्या त्यांच्या नातेवाईकांकडे जेवण करण्यासाठी गेले होते. दुपारी साडे चार वाजण्याच्या सुमारास ते त्यांच्या नातेवाईकांसह सदनिकेच्या बाल्कनीमध्ये थांबले होते. त्यावेळी त्यांचा तोल गेल्याने ते इमारतीच्या आठव्या मजल्यावरुन खाली पडले. त्यामध्ये त्यांच्या डोक्‍यासह संपुर्ण शरीराला गंभीर दुखापत झाली. त्यांना उपचारांसाठी रुग्णालयात दाखल केले, मात्र उपचारांपुर्वीच त्यांचा मृत्यु झाला. 

आदित्य ठाकरे हे शिवसेनेचे 'राहुल गांधी' टीव्ही अँकरची जीभ घसरली (व्हिडिओ)

रामदेव बाबा ट्रस्ट, दारुवाला पुलाजवळील आरसीएम गुजराथी हायस्कुलचे ते विश्‍वस्त होते. पुणे गुजराथी केळवणी संस्थेचे पदाधिकारी म्हणूनही शहा यांनी काम पाहिले. जनसेवा फाऊंडेशनचे मार्गदर्शक व विविध सामाजिक संस्थांद्वारे ते सामाजिक कार्यात सक्रीय होते. 

शहा यांना उंचावरुन बघण्याचा त्रास होत असे. त्यातच ते आठव्या मजल्यावर गेले होते. त्यानंतर तेथील बाल्कनीमध्ये थांबले होते. त्याचवेळी त्यांचा तोल जाऊन ते खाली पडल्यामुळे गंभीर जखमी होऊन त्यांचा मृत्यु झाला, असे चतुःश्रृंगी पोलिस ठाण्याचे पोलिस निरीक्षक अनिल शेवाळे यांनी स्पष्ट केले