वडगाव शेरी - खोटी माहिती देऊन बनवलेल्या बोगस शिधापत्रिका धारकांची शोध मोहीम येरवडा परिमंडळ विभाग प्रशासनाने सुरू केली आहे. येथील तब्बल बत्तीस हजार शिधापत्रिकाधारकांच्या कागदपत्रांचीही पडताळणी करण्यात येणार आहे. यामध्ये कौटुंबिक वार्षिक उत्पन्नाची खोटी माहिती देणाऱ्या रेशन कार्डधारकांवर प्रसंगी पोलीस कारवाई होणार आहे.
अन्न नागरी पुरवठा व ग्राहक संरक्षण विभाग यांचेकडून अपात्र शिधापत्रिका शोध मोहीम राबविणे बाबत आदेश देण्यात आलेले आहेत. त्यानुसार 31 मे पर्यंत पिवळे, केसरी आणि पांढऱ्या रेशन कार्ड धारकांची तपासणी करून अपात्र शिधापत्रिका रद्द करण्यात येतील.
येरवडा - वडगाव शेरी परिमंडळ विभागातील रास्त भाव दुकानदारांमार्फत ही मोहीम राबवण्यात येणार असल्याची माहिती ई विभागाचे परिमंडळ अधिकारी चांगदेव नागरगोजे यांनी दिली आहे. रेशन दुकानातून एप्रिल महिन्याचे धान्य घेणाऱ्या लाभार्थींना दुकानदार अर्ज वाटतील.
त्यानंतर अर्ज जमा करताना मागील वर्षभरातील रहिवासी पुरावा आणि उत्पन्नाचे हमीपत्र रेशन कार्ड धारकांना द्यावे लागेल. त्यानंतर या कागदपत्रांची तपासणी शासनाकडून होईल. खोटी माहिती आढळून आल्यास शिधापत्रिका रद्द होईल.
रास्त भाव दुकानातून धान्य घेणाऱ्या अनेक लाभार्थ्यांचे उत्पन्न 59 हजारापेक्षा पेक्षा जास्त असल्याच्या तक्रारी आहे. असे धान्य घेणारे लाभार्थी अपात्र ठरतील. तसेच दुबार रेशन कार्ड असणारे, मृत लाभार्थी या मोहिमेद्वारे शोधण्यात येतील. रास्त भाव दुकानदारांची बैठक आज येरवडा परिमंडळ कार्यालयात पार पडली. त्यावेळी मोहीम राबविण्याबाबत सूचना देण्यात आल्या.
धान्य वाटपावेळी लाभार्थी नागरिकांना अर्ज देऊन भरून घेतले जाणार आहे. आवश्यक कागदपत्राची पूर्तता न केल्यास शिधापत्रिका रद्द केल्या जातील तसेच नागरिकांनी वार्षिक कौटुंबिक उत्पन्नाबाबत चुकीची अथवा खोटी माहिती दिल्यास त्यांच्या विरूद्ध कारवाई केली जाईल आवश्यक तिथे पोलिस विभागाची मदत घेतली जाणार आहे.
- चांगदेव नागरगोजे (ई - परिमंडळ अधिकारी येरवडा)
येरवडा परिमंडळची स्थिती -
शिधापत्रिकाधारक संख्या (केसरी व पांढरे) - ३२ हजार,
पिवळे रेशन कार्ड - 461
धान्य घेणारे पात्र केसरी कार्डधारक - 28 हजार,
*रहिवासी पुरावा म्हणून वर्षभराच्या आतील लाईट बिल अथवा मतदान कार्ड
*उत्पन्नाचे हमीपत्र, आदी.
*59 हजार पेक्षा कमी उत्पन्न असणाऱ्याना धान्य मिळणारे केसरी कार्ड मिळणार.
*59 हजार ते एक लाखापर्यंत उत्पन्न असणाऱ्या नागरिकांना केसरी कार्ड मिळणार, परंतु धान्य मिळणार नाही.
येरवडा परिमंडळ विभागात किती नागरिकांना धान्य मिळते?
१) पिवळे आणि केसरी कार्ड धारक कुटुंबातील सुमारे एक लाख आठ हजार नागरिकांना रास्त भावात धान्य मिळते.
२) अपात्र रेशन कार्डधारकांचे नाव रद्द केल्यानंतर त्या जागी नव्या पात्र लाभार्थ्यांना धान्य मिळेल.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.