सर्वांना नियम सारखे! पुणे पोलिसांची KKR च्या खेळाडूवर कारवाई

कात्रज - कोरोनाच्या प्रादुर्भावामुळे शहरात कडक निर्बंध लावण्यात आलेले आहेत. पुण्यात पोलिसांचा अनेक ठिकाणी कडक बंदोबस्त असून विनाकारण आणि विनामास्क बाहेर पडणाऱ्यांवर थेट कारवाई करताना दिसून येत आहेत. या कारवाईत काही दिग्गज व्यक्तींवरही कारवाई करण्यात आल्याचे समोर आले आहे. पुणे पोलिसांनी आयपीएलमधील कोलकाता नाईट रायडर्सचा खेळाडू राहूल त्रिपाठीवर पु्ण्यातील कात्रज-कोंढवा रस्त्यावरील खडीमशीन चौकात विनामास्क कारवाई केली आहे.

शुक्रवारी दुपारच्या वेळी केकेआरचा खेळाडू राहूल त्रिपाठी हा आपल्या चारचाकी मोटारीने सासवडहून खडकी येथे जात होता. तेव्हा खडीमशिन चौकात कोंढवा पोलिसांनी त्याच्यावर विनामास्कची दंडात्मक कारवाई करत 500 रुपये दंड वसूल केला आहे. पोलिसांनी सांगितले की, दुपारच्यावेळी खडीमशिन चौकात विनामास्क फिरणाऱ्या नागरिकांवर कारवाई करण्यात येत होती. त्यावेळी चारचाकीतून जाणारा हा विनामास्क असल्याचे आम्हाला आढळून आले. तेव्हा दंडात्मक कारवाई करण्यात आली.

नाकाबंदी करणाऱ्या कर्मचाऱ्यांनी थांबवले असता तो क्रिकेटर राहूल त्रिपाठी असल्याचे लक्षात आले. मात्र, सर्वांना नियम सारखे असल्याचे निदर्शनास आणून देत आम्ही कारवाई केली. त्रिपाठी यांनीही तत्काळ दंड भरल्याची माहिती कोंढवा पोलिस स्थानकाचे उपनिरिक्षक संतोष सोनावणे यांनी दिली.