गाडी बाजूला घेण्यास सांगितल्याच्या रागातुन पोलिसाला जबर मारहाण; पाच जणांविरुद्ध गुन्हा दाखल | Sakal
sakal

बोलून बातमी शोधा

crime

कारसमोर उभी केलेली दुचाकी बाजूला घेण्यास सांगितल्याच्या रागातुन चार ते पाच जणांनी पोलिस कर्मचाऱ्यास जबर मारहाण करत डोक्‍यात सिमेंटचा ब्लॉक घातला.

गाडी बाजूला घेण्यास सांगितल्याच्या रागातुन पोलिसाला जबर मारहाण; पाच जणांविरुद्ध गुन्हा दाखल

पुणे - कारसमोर उभी केलेली दुचाकी बाजूला घेण्यास सांगितल्याच्या रागातुन चार ते पाच जणांनी पोलिस कर्मचाऱ्यास जबर मारहाण करत डोक्‍यात सिमेंटचा ब्लॉक घातला. दरम्यान, या घटनेमध्ये पोलिस कर्मचारी गंभीर जखमी झाला असून त्याच्यावर रुग्णालयात उपचार सुरु आहेत. याप्रकरणी चार ते पाच जणांविरुद्ध विमानतळ पोलिस ठाण्यात गुन्हा दाखल करण्यात आला आहे. हि घटना रविवारी (ता.18) सकाळी सव्वा दहा वाजता लोहगाव येथील पेट्रोलपंपाजवळ घडली.

कालिदास खांदवे, माऊली खांदवे, तुकाराम खांदवे (रा. लोहगाव) यांच्यासह इतर तिघांविरूद्ध विमानतळ पोलिस ठाण्यात गुन्हा दाखल करण्यात आला आहे. पी. आर. मोटे असे गंभीर जखमी झालेल्या पोलिस कर्मचाऱ्याचे नाव आहे. पोलिसांनी दिलेल्या माहितीनुसार, पोलिस कर्मचारी मोटे हे विमानतळ पोलिस ठाण्यात नेमणूकीला आहेत. ते रविवारी सकाळी सव्वा दहा वाजण्याच्या सुमारास धानोरी जकात नाका परिसरात गेले होते. त्यावेळी त्यांनी त्यांची कार तेथील पेट्रोलपंपाजवळ लावली होती. दरम्यान, त्यांच्या कारसमोर एकाने दुचाकी लावली.

मोटे यांनी संबंधित दुचाकीस्वार कालिदास खांदवे यास त्याची दुचाकी कारसमोरुन बाजुला घेण्यास सांगितले. त्याचा राग आल्यामुळे खांदवे याने त्याच्या साथीदारांना बोलावून मोटे यांना जीवे मारण्याच्या उद्देशाने जबर मारहाण केली. तसेच त्यांच्या डोक्‍यात सिमेंटचा ब्लॉक घातला. या घटनेमध्ये मोटे हे गंभीर जखमी झाले असून त्यांच्यावर रुग्णालयात उपचार सुरु आहेत. दरम्यान, याप्रकरणी विमानतळ पोलिस ठाण्यात गुन्हा दाखल झाला आहे. या प्रकरणाचा तपास सहाय्यक पोलिस निरीक्षक एस. एन. लहाने करीत आहेत.

राजकीय दबाव टाकत प्रकरण दडपण्याचा प्रयत्न

या प्रकरणामध्ये गुन्हा दाखल होऊ नये, यासाठी पोलिसांवरच राजकीय दबाव आणण्याचा प्रयत्न केला जात होता. मात्र प्रकरण गंभीर असल्याने गुन्हा दाखल करण्यात आला आहे. मात्र थेट पोलिसालाच जीवे मारण्याचा प्रयत्न होऊनही या प्रकरणातील संशयित आरोपींना अद्याप अटक झाली नसल्याची सद्यस्थिती आहे. दरम्यान, या प्रकरणावर वरिष्ठ पोलिस अधिकाऱ्यांचे लक्ष ठेवले असून लवकरच पुढील कारवाई होण्याची शक्‍यता आहे.

Web Title: Policeman Beaten By Youths Crime Pune

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..