दुर्गम वेल्ह्यात कोरोनाशी लढणाऱ्या आशा सेविकांना अनोखी भेट

वेल्हे (पुणे) : कोरोनाचा फैलाव रोखण्यासाठी दुर्गम वेल्हे तालुक्‍यातील राजगड- तोरणा या किल्ल्यांच्या परिसरात डोंगरदऱ्यात गेल्या सहा महिन्यांपासून पायपीट करणाऱ्या आशा सेविकांना वेल्हे तालुका पंचायत समितीच्या वतीने शेष फंडातून प्रत्येकी पाच हजार रुपयांचे बक्षीस (प्रोत्साहन भत्ता) देण्यात येणार आहे. 

पुण्याच्या इतर बातम्या वाचण्यासाठी येथे क्लिक करा

शेष फंडातून तालुक्‍यातील 48 आशा कर्मचारी व 3 गट प्रवर्तक अशा 51 कर्मचाऱ्यांच्या बॅंक खात्यात प्रत्येकी पाच हजार रुपये जमा करण्यात येणार आहे. यामध्ये ऑगस्ट ते डिसेंबर 2020 पर्यंत महिन्याला एक हजार रुपयांप्रमाणे पाच महिन्यांचे मिळून पाच हजार रुपये प्रोत्साहन भत्ता मिळणार असून, ऑगस्ट महिन्याचे एक हजार रुपये संबंधित कर्मचाऱ्यांच्या बॅंक खात्यात जमा झाल्याची माहिती गटविकास अधिकारी विशाल शिंदे यांनी दिली. 

पुण्यात चार लाख नागरिकांना ई पास

वेल्हे तालुका पंचायत समितीचे सभापती दिनकर सरपाले, उपसभापती सीमा राऊत, माजी सभापती संगीता जेधे, पंचायत सदस्य अनंत दारवटकर, गटविकास अधिकारी विशाल शिंदे, जिल्हा परिषद सदस्य अमोल नलावडे व दिनकर धरपाळे यांनी यासाठी पुढाकार घेतला. तहसीलदार शिवाजी शिंदे, तालुका आरोग्य डॉ. अंबादास देवकर, तालुका बालविकास अधिकारी साधू चांदणे, सहायक पोलिस निरीक्षक विनायक देवकर आदींनी या उपक्रमाचे कौतुक केले आहे. 

खडकवासला धरणक्षेत्रात पावसाची विश्रांती

वेल्हे तालुका हा राज्यात अतिदुर्गम व मागास आहे. लोकसंख्या कमी आहे. त्यामुळे अनेक आशा कर्मचाऱ्यांना चार ते पाच गावांत काम करावे लागत आहे. तुटपुंज्या मानधनात काम करणाऱ्या महिलांना चार ते पाच किलोमीटर अंतराची पायपीट करावी लागत आहे. तालुक्‍यातील खेडोपाडी कोरोनाचा संसर्ग सुरू झाल्यापासून आशा सेविका घरोघरी जात आहेत. माहिती गोळा करत आहे. त्यामुळे कोरोनाचा उद्रेक रोखण्यात प्रशासनाला यश आले आहे, असे जिल्हा परिषद सदस्य अमोल नलावडे यांनी सांगितले.  आशा कर्मचाऱ्यांच्या कामाची दखल घेऊन बक्षीस देण्यात आले आहे. असे बक्षीस देणारी वेल्हे पंचायत समिती ही राज्यातील पहिली पंचायत समिती असावी, असे वेल्हे पंचायत समितीचे सभापती दिनकर सरपाले यांनी सांगितले.