पुणे : ‘पॉवर’ विना ११० ई-बस डेपोतच

- अमोल अवचिते

पुणे - पंतप्रधान नरेंद्र मोदी (Narendra Modi) यांच्या हस्ते बाणेर येथील डेपोतील १४० ई-बसचे (E-Bus) लोकार्पण मोठ्या थाटात करण्यात आले. त्यानंतर या सर्व बस दिमाखात प्रवाशांच्या सेवेसाठी दाखल होतील, अशी अपेक्षा प्रवाशांना होती. मात्र, १४० पैकी केवळ ३० बसच रस्त्यावर धावत असून अजूनही ११० ई-बस ‘पॉवर’ (Power) विना डेपोतच उभ्या असल्याचे समोर आले आहे.

केंद्र आणि राज्य सरकारच्या ई- पॉलिसी धोरणानुसार इलेक्ट्रिक वाहनांना प्राधान्य दिले जाणार आहे. बाणेरमधीले ई- डेपो जागतिक दर्जाचा उभारला आहे. तसेच प्रतिदिन प्रति बस २०० किमीप्रमाणे बस संचलनाचे नियोजन आहे. या ३५० बससाठी बाणेर, वाघोली, मोशी, चऱ्होली व निगडी हे पाच डेपो विकसित केले जाणार आहेत. डेपोवर एकावेळी ३५ बस चार्जिंग करता येणार आहेत. त्यासाठी ३५ एसी/डीसी चार्जर बसविलेले आहेत. पूर्ण चार्जिंग होण्यासाठी चार ते साडेचार तास लागतात. परंतु महावितरणकडून पुरेशी वीज मिळाली नसल्याने ई-बस उभ्या आहेत. नव्याने दाखल होणाऱ्या ई-बसच्या चार्जिंगचे नियोजन कसे करणार?, असा प्रश्न या निमित्ताने उपस्थित केला जात आहे.

• १४० ई-बस - पंतप्रधानांच्या हस्ते लोकार्पण

• ३० ई-बस - पाच मार्गांवर सेवा सुरु

• ७० बस - १४ मार्गांवर सुरु करणार

अशा मिळणार ई-बस

• ३५० - पुणे व पिंपरी महापालिका

• १५० - केंद्राची फेम-२ योजना

काय आहेत अडचणी?

• पूर्ण चार्जिंगसाठी चार ते साडेचार तास लागतात

• महावितरणकडून पुरेशी वीज मिळेना

• विजेअभावी ई बसला चार्जिंग करण्यास अडथळा

बाणेर ई-डेपोला ४५०० किलो वॉट विजेची आवश्यकता आहे. सध्या १२०० किलोवॉट इतकाच वीजपुरवठा होत आहे. त्यामुळे ई बसला चार्जिंग करण्यास अडथळा येत आहे. महावितरणकडून स्वतंत्र डीपी उभारला जाणार आहे. त्यांचा महापालिकेकडे पाठपुरावा सुरु आहे. त्यामुळे काही दिवसात पूर्ण क्षमतेने वीज पुरवठा सुरळीत होईल. या ई-बस पीएमपीच्या ताफ्यात अतिरिक्त दाखल झाल्या आहेत. त्यामुळे डेपोत या बस उभ्या असल्याने पीएमपीच्या उत्पन्नावर कोणताही परिणाम होत नाही.

- डॉ. चेतना केरूरे, सहव्यवस्थापकीय संचालिका

कोट्यवधी रुपयांची गुंतवणूक करून ई-बस पीएमपीच्या ताफ्यात दाखल झाल्या आहेत. मात्र याचे गांभीर्य पीएमपीला नाही. सध्या कर्मचाऱ्यांची संख्याही कमी आहे. त्यामुळे पीएमपीचे नुकसान होत आहे. सेवा सुरळीत करण्यासाठी तत्काळ नवीन भरतीची गरज आहे.

- सुनील नलावडे, सरचिटणीस, पीएमपी राष्ट्रवादी महाराष्ट्र जनरल कामगार युनियन

तुम्हाला काय वाटते ?

कोट्यवधी रुपये खर्चून फक्त वीज पुरवठ्याअभावी ई-बस जाग्यावरच उभ्या आहेत. याबाबत आपल्या नावासह प्रतिक्रिया editor.pune@esakal.com या मेलवर किंवा ८४८४९७३६०२ या क्रमांकावर पाठवावी.