Pune Crime : मैत्रिणीला धक्का लागल्याच्या कारणावरून बेदम मारहाणीत मृत्यू , दोघांना सात वर्षे सक्तमजुरीची शिक्षा

Pune Crime - मैत्रिणीस धक्का लागल्याच्या कारणावरून एकाला बेदम मारहाण करीत त्याच्या मृत्यूस कारणीभूत ठरलेल्या दोघांना न्यायालयाने सात वर्षे सक्तमजुरी आणि प्रत्येकी तीन लाख रुपये दंडाची शिक्षा सुनावली. सत्र न्यायाधीश पी. पी. जाधव यांनी हा निकाल दिला.

टिपू सुलतान मन्सूरी (वय २४ रा. घोरपडी) व अनिरुद्ध राठोड (वय २५ रा. वडगाव शेरी) अशी शिक्षा झालेल्यांची नावे आहेत. मन्सूरी आणि राठोड यांनी केलेल्या मारहाणीत चंदन प्रकाश जयप्रकाश सिंग (वय ३६, रा.विश्रांतवाडी) यांचा मृत्यू झाला होता.

चंदन हे मैत्रिणीसोबत २४ फेब्रुवारी २०१९ ला खराडीमधील हॉटेल एम्पायर येथे जेवण करण्यासाठी गेले होते. मन्सूरी व राठोड हे देखील त्याच हॉटेलमध्ये जेवण करण्यासाठी आले होते. चंदन यांच्या मैत्रिणीस आरोपींचा धक्का लागला.

या कारणावरून चंदन व दोन्ही आरोपी यांच्यात हॉटेलमध्ये भांडणे झाली. रात्री दीडच्या सुमारास हॉटेलमधून बाहेर आल्यानंतर मन्सूरी व राठोड यांनी चंदन यांना हाताने, लाथाबुक्क्यांनी व दगडाने मारहाण केली. हा मारहाणीचा सर्व

प्रकार हॉटेल बाहेर सीसीटीव्ही कॅमेऱ्यामध्ये चित्रित झाला होता. चंदन हे घरी गेल्यानंतर त्यांना चक्कर येऊ लागली. त्यामुळे त्यांना रुग्णालयात दाखल केले. मात्र उपचारादरम्यान त्यांचा मृत्यू झाला. या घटनेची फिर्याद चंदन यांचे बंधू राहुल जयप्रकाश सिंग यांनी चंदननगर पोलिस ठाण्यात दिली होती.

त्यावरून दोन्ही आरोपींवर गुन्हा दाखल करण्यात आला. या खटल्याचे कामकाज सरकारी वकील चंद्रकिरण साळवी यांनी पाहिले. गुन्हा शाबीत करण्यासाठी त्यांनी १२ साक्षीदारांची साक्ष घेतली.

घटनेची सीसीटीव्ही फुटेज व प्रत्यक्षदर्शी साक्षीदार यांची साक्ष ग्राह्य धरून न्यायालयाने दोन्ही आरोपींना दोषी धरून त्यांना सात वर्षे सक्तमजुरी आणि प्रत्येकी तीन लाख रुपये दंडाची शिक्षा सुनावली. दंडाच्या रकमेपैकी पाच लाख रुपये चंदन यांच्या पत्नीस देण्यात यावे, असे आदेशात नमूद आहे.