पुणेकरांसाठी दिलासा; कोरोना रुग्ण संख्या वेगाने होतेय कमी

पुणे - पुणे जिल्ह्यातील (Pune District) एकूण सक्रिय कोरोना रुग्णांची (Corona Patients) संख्या वेगाने कमी होऊ लागली आहे. पुणेकरांसाठी मोठी दिलासा देणारी ही घटना ठरु लागली आहे. गेल्या सात दिवसांत ३० हजार २३३ सक्रिय कोरोना रुग्ण कमी झाले आहेत. यानुसार दिवसाला सरासरी ४ हजार ३१९ सक्रिय रुग्ण कमी होत असल्याचे उघडकीस आले आहे.

सद्यस्थितीत पुणे जिल्ह्यात ६३ हजार ४०९ सक्रिय कोरोना रुग्ण आहेत. यामध्ये रविवारी (ता.३०) दिवसभरात आढळून आलेल्या ७ हजार ६१७ नवीन रुग्णांचा समावेश आहे. रविवारी दिवसभरात जिल्ह्यातील १५ रुग्णांचा कोरोनाने मृत्यू झाला आहे. दिवसातील एकूण मृत्यूमध्ये पुणे शहरातील आठ, पिंपरी-चिंचवडमधील पाच आणि जिल्हा परिषद कार्यक्षेत्रातील दोन कोरोना मृत्यू आहेत. दिवसभरात नगरपालिका आणि कॅंटोन्मेंट बोर्ड क्षेत्रात एकाही रुग्णाचा कोरोनाने मृत्यू झाला नाही.

जिल्ह्यातील दिवसातील एकूण नवीन कोरोना रुग्णांमध्ये पुणे शहरातील सर्वाधिक ३ हजार ८९६ नवे रुग्ण आहेत. पिंपरी चिंचवडमध्ये २ हजार १३३, जिल्हा परिषद कार्यक्षेत्रात १ हजार १५५, नगरपालिका हद्दीत २८६ आणि कॅंटोन्मेंट बोर्ड क्षेत्रात १४७ नवे रुग्ण सापडले आहेत.

याऊलट जिल्ह्यात १३ हजार ७०४ जण कोरोनामुक्त झाले आहेत. जिल्ह्यातील दिवसातील एकूण कोरोनामुक्तांमध्ये पुणे शहरातील सर्वाधिक ६ हजार २८३ जण आहेत. पिंपरी चिंचवडमधील ४ हजार ३६९, जिल्हा परिषद कार्यक्षेत्रातील २ हजार ३०५, नगरपालिका हद्दीतील ५१६ आणि कॅंटोन्मेंट बोर्ड क्षेत्रातील २३१ जणांनी कोरोनावर मात केली आहे.