पुण्यात दुधाचा तुटवडा होण्याची शक्यता

पुणे, ता.  ३१ : पुणे व पिंपरी-चिंचवड शहरात शनिवारी वितरित करण्यासाठी सर्वच दूध संस्थांकडे दुधाचा पुरेसा साठा उपलब्ध आहे. त्यामुळे शनिवारी नियमित दूध पुरवठा सुरळीत राहिल, असे विविध दूध संघांनी शुक्रवारी स्पष्ट केले. मात्र शनिवारी होणाऱ्या दूध दरवाढ आंदोलनामुळे दूध संकलनात अडथळे निर्माण झाले तर, रविवारी शहरात तुटवडा निर्माण होऊ शकतो, असा प्राथमिक अंदाज वर्तविण्यात आला आहे. 

राज्यातील दूध उत्पादक शेतकऱ्यांना दुधाला प्रतिलिटर ३० रुपये दर मिळावा, या मागणीसाठी भाजपप्रणीत महायुतीच्यावतीने राज्यव्यापी दूध दरवाढ आंदोलन करण्यात येणार आहे. त्यामुळे या आंदोलनाच्या दिवशी दूध संकलनात अडथळे निर्माण होऊ शकतात. याचा परिणाम आंदोलनाच्या दुसऱ्या दिवशी होऊ शकतो, असेही यावेळी सांगण्यात आले.

हे वाचा - अपघातग्रस्तासाठी राज्यमंत्र्यांची अलिशान गाडी बनली रुग्णवाहिका

साधारणतः शहरात दुसऱ्या दिवशी वितरित केले जाणारे दूध आदल्या दिवशीच संकलीत केले जाते आणि मध्यरात्रीपासूनच ते वितरित करण्यात येते. त्यामुळे आंदोलन सुरु होईपर्यंत वितरण पुर्ण झालेले असेल. परिणामी तुटवडा जाणण्याचा प्रश्न उद्भभवणार नाही. 

पुणे व पिंपरी-चिंचवड शहराला दररोज सुमारे १५ लाख लिटर पिशव्यांमधील दूध लागत असते. मात्र मागील तीन महिन्यांपासून दररोजच्या मागणीत ५ लाख लिटरने घट झालेली आहे. मिठाई दुकाने, हाॅटेल्स आणि चहा टपऱ्या आणि शाळा महाविद्यालये बंद असल्याने ही घट झालेली आहे.

पुण्यातील बातम्या वाचण्यासाठी इथे क्लिक करा

आंदोलनाला पाठिंबा; नासधूस नको - देवेंद्र शहा 
राज्यातील दूध उत्पादक शेतक-यांना दूध दरवाढ मिळावी, या मागणीसाठी उद्या पुकारण्यात आलेल्या आंदोलनाला गोवर्धन दूध प्रकल्पाही पाठिंबा आहे. शेतकऱ्यांना जास्त दर मिळावा, अशीच इच्छा आहे. पण बाजारातील सध्याच्या स्थितीमुळे हे शक्य नाही. त्यामुळे आंदोलनकर्त्यांनी शांतता मार्गाने आंदोलन करावे. दूधाची नासधूस करु नये, असे आवाहन गोवर्धन दूध प्रकल्पाचे चेअरमन देवेंद्र शहा यांनी केले आहे.