पुणे महापालिका निवडणुकीपूर्वी नगरसेवकांची उद्घाटनासाठी लगबग

पुणे : पुणे महापालिकेच्या निवडणुकीचे पडघम वाजण्यास सुरवात झाली आहे. त्यामुळे आता येत्याकाळात शहराच्या सर्वच भागात नगरसेवकांकडून धुमधडाक्यात प्रभागातील लहानमोठ्या कामांच्या उद्घाटनाचा सपाटा लावला जाणार आहे. महापालिकेच्या पक्षनेत्यांनी आज तब्बल ८६ उद्घाटनांसह इतर कार्यक्रमांना मान्यता दिली.

पुणे महापालिकेच्या नगरसेवकांची मुदत १४ मार्च रोजी संपणार आहे. त्यापूर्वी महापालिका निवडणुकीचा आचारसंहिता लागणे अशक्य असल्याने महापालिकेवर प्रशासक येईल व सर्व नगरसेवक आपोआप माजी नगरसेवक होणार असल्याची स्थिती आहे. त्यामुळे प्रभागातील उरलेली कामे, वर्गीकरण लवकर करून घेण्यासाठी नगरसेवकांची गडबड सुरू आहे. जी कामे झाली आहेत त्याचे उद्घाटन ही पक्षांच्या नेत्यांच्या उपस्थितीत करून प्रभागात पोषक वातावरण निर्माण करण्याचा प्रयत्न नगरसेवकांचा आहे.

प्रभागात बांधण्यात आलेले क्रीडांगण, अग्निशामक केंद्र, रस्ता, लाइट हाऊस प्रकल्प, पाण्याची टाकी, विकसित केलेले उद्यान, महापुरुषांचे पुतळ्याचे अनावरण, जीमन्यॅशियम हॉल, चौकांमध्ये किंवा दुभाजकावर किंवा पादचारी मार्गावर उभारण्यात आलेले शिल्प, बालोद्यान, प्रसूतिगृह, ओटा मार्केट, चौक सुशोभीकरण यासह इतर अनेक उद्घाटनाचे व महापालिकेत महापुरुषांचे तैलचित्र व लाल महालमध्ये छत्रपती शिवाजी महाराज यांनी शाहिस्तेखानाची बोटे छाटली हे तैलचित्र लावावेत असे प्रस्ताव मंजुरीसाठी पक्षनेत्यांच्या बैठकीपुढे ठेवण्यात आलेले होते.

त्यास आज मंजुरी देण्यात आली. त्यानंतर हे प्रस्ताव लगेच मुख्यसभेपुढे ठेवून त्यास मंजुरी देण्यात आली. यामध्ये सत्ताधारी भाजपसह, काँग्रेस, राष्ट्रवादी, शिवसेनेसह इतर पक्षांच्या नगरसेवकांच्या प्रभागातील कामांचा समावेश आहे.

महापौर मुरलीधर मोहोळ म्हणाले, ‘‘पक्षनेत्यांच्या बैठकीमध्ये नगरसेवकांनी केलेल्या कामांचे उद्घाटन करण्यासाठी मंजुरीचे प्रस्ताव ठेवण्यात आले होते. त्यास मंजुरी देण्यात आली आहे.