'सोन्या' म्हटल्याच्या रागातून बुलेट चालकासह 2 महिलांना मारहाण; हडपसरमधील घटना

पुणे- दुचाकीचा आवाज वाढविल्याचा जाब विचारणाऱ्यास सोन्या म्हटल्याच्या रागातून सहा ते सात जणाच्या टोळक्‍याने तरुणास लाथाबुक्‍क्‍यांनी जबर मारहाण केली. त्याचबरोबर तरुणाची पत्नी आणि सासूलाही जबर मारहाण केली. ही घटना गुरूवारी रात्री दहा वाजण्याच्या सुमारास हडपसर येथील साडे सतरानळी परिसरात घडली. याप्रकरणी आठ जणांविरुद्ध हडपसर पोलिस ठाण्यात गुन्हा दाखल करण्यात आला आहे. याप्रकरणी आनंदा काळे (वय 25, रा.साडेसतरा नळी, हडपसर) यांनी फिर्याद दिली आहे. त्यावरुन आठ जणांविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी काळे हे गुरूवारी रात्री दहा वाजण्याच्या सुमारास त्यांच्या बुलेटवरुन हडपसरमधील साडेसतरा नळी परिसरातून जात होते. त्यावेळी त्यांनी बुलेटची रेस वाढविल्याने मोठा आवाज झाला. तेव्हा आरोपींपैकी एकाने फिर्यादीस "आवाज कोणाला काढला रे' असा जाब विचारला. त्यावेळी फिर्यादीने "ऐ सोन्या तुला नाही' असे उत्तर दिले. त्याचा राग आल्याने आरोपीने "मला सोन्या नाही म्हणायचे, मी इथला भाई आहे. यापुढे मला भाई म्हणायचे' अशी धमकी देत फिर्यादीस लाथाबुक्‍क्‍यांनी कमरेच्या पट्ट्याने जबर मारहाण केली. हा प्रकार पाहून फिर्यादीची पत्नी व सासू भांडणे सोडविण्यासाठी आल्या. त्यावेळी आरोपींनी फिर्यादीची पत्नी आणि सासूलाही हाताने मारहाण केली. या प्रकरणाचा तपास पोलिस उपनिरीक्षक एस.बी.जाधव करीत आहेत.