Pune: पंखा सुरू करण्याच्या बहाण्याने महिला कर्मचाऱ्याशी लगट करण्याचा सहायकाचा प्रयत्न; गुन्हा दाखल

पुणे : एका अभियांत्रिकी महाविद्यालयातील महिला कर्मचाऱ्याचा संगणक प्रयोगशाळेतील सहायकाने विनयभंग केल्याची घटना नऱ्हे परिसरात घडली. या प्रकरणी महिला कर्मचाऱ्याने फिर्याद दिली आहे.

त्यावरून सिंहगड रस्ता पोलिस ठाण्यात गुन्हा दाखल करण्यात आला आहे. मणेश विठ्ठल कडू (वय ३५, रा. किरकटवाडी, सिंहगड रस्ता) असे अटक केलेल्या कर्मचाऱ्याचे नाव आहे. पोलिसांनी दिलेल्या माहितीनुसार, ही २९ वर्षीय महिला नऱ्हे भागातील एका महाविद्यालयात नोकरीस आहे.

महाविद्यालयातील संगणक प्रयोगशाळेतील कर्मचारी मणेश कडू याने त्या महिलेला विभाग प्रमुखांच्या खोलीतील पंखा सुरू करण्याच्या बहाण्याने बोलावले. त्यानंतर त्याने महिला कर्मचाऱ्याशी लगट करण्याचा प्रयत्न केला. याबाबत महिलेने पोलिस ठाण्यात फिर्याद दिल्यानंतर पोलिसांनी कडू याला अटक केली.