Pune Crime : मॉडेल कॉलनीत पगारावरून झालेल्या मारहाणीत कामगाराचा मृत्यू

पुणे - पगारावरुन झालेल्या वादातून झालेल्या मारहाणीत एका कामगाराचा मृत्यू झाला. ही घटना शिवाजीनगर येथील मॉडेल कॉलनी परिसरात घडली. या प्रकरणी चतु:शृंगी पोलिसांनी १३ जणांविरुद्ध गुन्हा दाखल केला आहे.

अविनाश भिडे (वय ३६, रा. बेनकर वस्ती, धायरी) असे मृत्युमुखी पडलेल्या कामगाराचे नाव आहे. याबाबत भिडे यांच्या पत्नीने चतु:शृंगी पोलिस ठाण्यात फिर्याद दिली आहे. त्यानुसार शेखर महादेव जोगळेकर (वय ५८), प्रणव शेखर जोगळेकर (वय २२, दोघे रा. मॉडेल कॉलनी), दयानंद सिद्राम इरकल (रा. पांडवनगर), बाळू पांडुरंग मिसाळ (रा. कर्वेनगर), प्रमोद श्रीरंग शिंदे (रा. शिवणे), रुपेश रवींद्र कदम,

संतोष ऊर्फ बंटी दत्तात्रेय हरपुडे, प्रकाश नाडकर्णी, नकुल शेंडकर यांच्यासह अन्य चार संशयितांविरुद्ध गुन्हा दाखल केला आहे. पोलिसांनी दिलेल्या माहितीनुसार, भिडे हे जोगळेकर यांच्याकडे मशिन ऑपरेटर म्हणून कामास होते. त्यांच्यात पगारावरुन वाद झाला होता. एक सप्टेंबर रोजी आरोपींनी भिडे यांना बेदम मारहाण केली. त्यात गंभीर जखमी झालेल्या भिडे यांचा उपचारादरम्यान मृत्यू झाला. या प्रकरणी पोलिसांनी अकस्मात मृत्यूची नोंद केली होती. तपासानंतर पोलिसांनी खुनाचा गुन्हा दाखल केला आहे.