Diwali Pahat: पुणेकरांच्या उत्साहाने रंगली सारसबागेतील दिवाळी पहाट

दोन वर्षानंतर सर्वत्र दिवाळी धुमधडाक्यात साजरी होताना दिसत आहे. पुण्यातील सारसबागेत दिवाळी पाडव्यानिमित्त दिवाळी पहाट कार्यक्रम आयोजित करण्यात आला होता. या कार्यक्रमाला पुणेकरांनी मोठ्या प्रमाणावर हजेरी लावली. पुणेकरांच्या उत्साहाने या दिवाळी पहाट कार्यक्रमाला एक वेगळीच रंगत आली. दिवाळी पहाट कार्यक्रमासाठी जमलेल्या पुणेकरांनी सारसबागेतील गणपती मंदिरात दर्शनासाठी गर्दी केली.

आज दिवाळी पाडवा असल्याकारणाने मोठ्या संख्येने नागरिक सारसबागेतील तळ्यातील गणपतीचे दर्शन घेण्यासाठी येत असतात. गेल्या अनेक वर्षांपासून सारसबागेत मोठ्या संख्येने तरुणाई देखील येत असते. या वर्षी देखील पहाटेपासून बागेत गर्दी जमायला सुरवात झाली.

गेली 2 वर्ष कोरोना निर्बंध असल्यामुळे पाडव्याला गर्दी नव्हती. यंदा मात्र सारसबाग हाऊसफुल्ल झाल्याचे दिसून आले. कोरोना निर्बंध असल्यामुळे कोणतेच सण साजरे करता आले नाहीत मात्र 2 वर्षाच्या कालावधीनंतर आधीसारखच उत्साह यावर्षीही दिसून येत आहे.