Pune: दिवाळीत पुणे-कोल्हापूर विशेष रेल्वे धावणार, नोकरदारांना दिलासा

पुणे, ता. २७ ः रेल्वे प्रशासनाने प्रवाशांच्या मागणीनुसार दिवाळीत पुणे-कोल्हापूर-पुणे अशी विशेष रेल्वे सुरू करण्याचा निर्णय घेतला आहे. ५ नोव्हेंबर ते ३१ डिसेंबर दरम्यान ही रेल्वे धावेल. दिवाळीत ही रेल्वे सुरू होत असल्याने प्रवाशांची सोय होणार आहे.

रेल्वे प्रशासन कोल्हापूर -पुणे दरम्यान सह्याद्री एक्स्प्रेस सुरू करण्याच्या प्रयत्नात आहेत. तत्पूर्वीच रेल्वे प्रशासन दिवाळीच्या काळात पुणे-कोल्हापूर-पुणे अशी विशेष रेल्वे सुरू करीत आहे. या गाडीला १६ डबे असतील. यासाठी महाराष्ट्र एक्स्प्रेसचा रेक वापरण्यात येणार आहे.

५ नोव्हेंबर ते ३१ डिसेंबर दरम्यान या गाडीच्या ११४ फेऱ्या होणार आहेत. पुणे- कोल्हापूर ही गाडी पुण्यातून रात्री ९ वाजून ४५ मिनिटांनी सुटेल. कोल्हापूरला सकाळी ५ वाजून ४० मिनिटांनी पोहोचेल. कोल्हापूरहून ही गाडी रात्री ११ वाजून ३० मिनिटांनी सुटेल. ती गाडी दुसऱ्या दिवशी सकाळी सात वाजून ४५ मिनिटांनी पुण्यात येईल.