Pune News : गृहनिर्माण सोसायटीमध्येही स्थापन होणार तंटामुक्ती समिती : उपनिबंधक संजय राऊत

हडपसर - गृहनिर्माण सोसायट्यांमध्ये किरकोळ स्वरूपाचे अनेक वाद होत असतात. ते मिटवण्यासाठी सभासद थेट उपनिडबंधक कार्यालयाची पायरी गाठतात. यामध्ये सभासदांना मोठे नुकसान सहन करावे लागते. त्यामुळे हे वाद मिटवण्यासाठी गाव पातळीवरील तंटामुक्ती समितीप्रमाणे सोसायट्यांमध्येही अशी तंटामुक्ती समिती नेमण्याचा सरकारच्या विचाराधीन आहे, अशी माहिती शहर-जिल्हा उपनिबंधक संजय राऊत यांनी दिली.

सहकार विभाग, सावली फाउंडेशन आणि सप्तसिध्दी असोसिएट यांच्या वतीने ससाणेनगर येथे "डिम्ड कन्व्हेन्स आणि इमारत पुनरनिर्माण' या विषयाव कार्यशाळेचे आयोजन केले होते. त्यावेळी गृहनिर्माण सोसायटी पदाधिकारी व सभासदांना मार्गदर्शन करताना ते बोलत होते. फाउंडेशनचे अध्यक्ष योगेश ससाणे यांनी या कार्यशाळेचे आयोजन केले होते. जिल्हा उपनिबंधक प्रकाश जगताप, आर्किटेक अतीत अदमुलवार, विधीतज्ञ अनिल तांबे तसेच, संजय ससाणे, वैभव माने, प्रथमेश ससाणे आदी यावेळी उपस्थित होते.

कार्यशाळेत हडपसर परिसरातील २०८ सोसायटी प्रतिनिधी सहभागी झाले होते. यावेळी वर्धमान टाऊनशिप, निर्मल टाऊनशिप, गांगा व्हीलेज, फोश सहकारी सोसायटीच्या सभासदांनी डिम्ड कन्व्हेन्स आणि इमारत पुनरनिर्माणच्या संदर्भामध्ये प्रश्न उपस्थित केले होते.

उपनिबंधक राऊत म्हणाले, "कन्व्हेस्ट डीड करण्याकरिता सोसायटीच्या पदाधिकाऱ्यांनी सहकार विभागासोबत संपर्क केला पाहिजे. जुन्या मोडकळीस आलेल्या सोसायट्या कागदपत्रांची पूर्तता करून स्वतः पुनरनिर्माणचा निर्णय घेऊ शकतात.'