महत्त्वाची बातमी : पुणेकरांनो, घाबरून जाऊ नका; संचारबंदीबाबत पोलिस प्रशासनाचे आवाहन

पुणे : ब्रिटनमध्ये कोरोना विषाणुचा नवा प्रकार आढळून आल्याने सतर्कता म्हणून राज्यातील महापालिका क्षेत्रामध्ये रात्रीची संचार बंदी लागू करण्याचे आदेश दिले आहेत. रात्री अकरा ते सकाळी सहा या वेळेतच संचारबंदी असणार आहे. तर रात्री अकरापर्यंत पूर्वीप्रमाणेच सर्व व्यवहार सुरळीत सुरू राहणार आहेत. त्यामुळे नागरिकांनी घाबरून जाऊ नये. 

ब्रिटनमध्ये आढळलेल्या नव्या विषाणूंचा प्रकार आढळला असून तो अधिक धोकादायक असल्यामुळे ब्रिटन पुन्हा लॉकडाऊन लागू करण्यात आले आहे. त्यामुळे राज्य सरकारनेही सतर्कता म्हणून ख्रिसमस व नववर्षाच्या पार्श्‍वभूमीवर रात्रीच्या संचारबंदीचा निर्णय घेतला आहे. मंगळवारपासून (ता.22) ते 5 जानेवारीपर्यंत राज्य सरकारचा आदेश लागू असणार आहे. त्यादृष्टीने राज्यातील महापालिकांना सतर्कतेच्यादृष्टीने काळजी घेण्याच्या सूचना राज्य सरकारने दिल्या आहेत. 

- प्रसाद कोहिनकर बनला सैन्यदलात लेफ्टनंट; पुण्याच्या शिरपेचात आणखी एक मानाचा तुरा!​

संचारबंदी आदेश हा फक्त रात्री अकरा ते सकाळी सहा या वेळेपुरता असणार आहे. सकाळी सहा ते रात्री 11 या वेळेमध्ये शहरांमधील जनजीवन पूर्वीप्रमाणेच सुरू राहणार आहे. नागरिकांनी घाबरून जाऊ नये, तसेच कुठल्याही प्रकारच्या अफवांवर विश्‍वास ठेवू नये, असे आवाहन प्रशासनाने केले आहे. 

पहिला लॉकडाऊन 23 ते 31 मार्च 2020 
कोरोनाच्या पार्श्‍वभुमीवर राज्यात पहिल्यांदा 23 मार्च रोजी पहिल्यांदा लॉकडाऊन जाहीर करण्यात आला होता.23 ते 31 मार्च या कालावधीपर्यंत पहिला लॉकडाऊन जाहीर करण्यात आला होता. त्यानंतर टप्प्याटप्प्याने लॉकडाऊनमध्ये वाढ करण्यात आली. त्यानंतर जुलैपासून लॉकडाऊनचे नियम हळूहळू शिथील करण्यात आले. त्याचबरोबर उद्योग, व्यावसाय सुरू करण्यास प्राधान्य देण्यात आले होते. 

- विद्यार्थी आणि पालकांनो, अॅडमिशनवेळी जास्त पैसे घेतलेत? मग अशी करा तक्रार​

''शासनाच्या आदेशाच्या प्रतीची आम्ही वाट पाहत आहोत. शासनाकडून देण्यात येणाऱ्या आदेशाची काटेकोरपणे अंमलबजावणी केली जाईल. नागरीकांनी देखील प्रशासनाचा अधिकृत आदेश प्रमाण मानावा. प्रशासनाची माहिती प्रसारमाध्यमांद्वारे लोकांपर्यंत पोचवली जाईल. त्यामुळे नागरीकांनी घाबरून जाऊ नये. तसेच कोणत्याही प्रकारच्या अफवांवर विश्‍वास ठेवू नये.''
- डॉ.रवींद्र शिसवे, पोलिस सहआयुक्त

- पुण्याच्या बातम्या वाचण्यासाठी येथे ► क्लिक करा

(Edited by: Ashish N. Kadam)