Pune Porsche Crash Case : आईच्या शस्त्रक्रियेसाठी विशाल अग्रवालचा तात्पुरत्या जामिनाचा अर्ज न्यायालयाने फेटाळला

पुणे : कल्याणीनगर ‘पोर्श’ अपघात व ससून रुग्णालयात अल्पवयीन मुलांचे रक्त बदलल्या प्रकरणात कोठडीत असलेला बांधकाम व्यावसायिक विशाल अग्रवालने जामिनासाठी केलेला अर्ज न्यायालयाने फेटाळला. आईच्या शस्त्रक्रियेसाठी तात्पुरता जामीन मिळावा, असे कारण देत अर्ज करण्यात आला होता. .शस्त्रक्रियेचे स्वरूप पाहता आरोपीच्या आईची काळजी घेण्यासाठी कुटुंबातील इतर सदस्य उपलब्ध आहेत. त्यामुळे आरोपीला तात्पुरता जामीन देण्यास कोणताही न्याय्य आधार नाही, असे नमूद करत अतिरिक्त सत्र न्यायाधीश के. पी. क्षीरसागर यांनी हा जामीन अर्ज फेटाळला..कल्याणीनगरमधील अपघाताच्या घटनेनंतर कारचालक मुलगा व त्याच्या दोन मित्रांच्या रक्ताचे नमुने ससून रुग्णालयात बदलण्यात आले होते. या गुन्ह्यात विशाल अग्रवाल व त्याची पत्नी शिवानीसह एकूण दहा आरोपींवर गुन्हा दाखल करण्यात आला आहे. या गुन्ह्यात येथील विशेष न्यायालयात आरोप निश्चितीची प्रक्रिया सुरू आहे. या दरम्यान, आरोपी विशाल अग्रवालने आईच्या शस्त्रक्रियेच्या कारणास्तव २१ दिवसांचा तात्पुरता जामीन देण्याची मागणी केली. आई आजारी असून, तिला कंबरेच्या मणक्यांच्या शस्त्रक्रियेचा सल्ला देण्यात आला आहे. एकुलता एक मुलगा असल्याने शस्त्रक्रियेपूर्वी व शस्त्रक्रियेनंतर आईची काळजी घेण्यासाठी मानवतेच्या आधारावर तात्पुरता जामीन मंजूर करावा, अशी मागणी करणारा अर्ज विशाल अग्रवालच्या वकिलांनी केला होता..जामीन अर्जास विशेष सरकारी वकील शिशिर हिरे यांनी विरोध केला. आरोपी विशाल अग्रवालच्या आईचा आजार हा वयोमानाशी निगडित असून, शस्त्रक्रिया ही नियोजित आहे. आरोपीचे वडील, बहीण, पत्नी, मुलगा, मेहुणे आदी नातेवाईक आईची काळजी घेऊ शकतात. आरोपीने सहआरोपींसमवेत कट रचून गुन्ह्याचा तपास आणि न्याययंत्रणेत हस्तक्षेप करण्याचा प्रयत्न केला आहे. या प्रकरणी सरकार पक्षाच्या पुराव्याशी छेडछाड होण्याची शक्यता आहे. त्यामुळे आरोपीचा तात्पुरत्या जामिनाचा अर्ज फेटाळण्यात यावा, असा युक्तिवाद विशेष सरकारी वकील शिशिर हिरे यांनी केला..साक्षी-पुराव्यांशी छेडछाड होण्याची वाजवी भीती ‘पीडितांच्या हक्कांचा आरोपीच्या हक्कांशी समतोल राखणे आवश्यक आहे, हे लक्षात घेता आरोपीची तात्पुरत्या जामीनावर सुटका करणे हे समाजहितासाठी घातक ठरण्याची शक्यता आहे. गुन्ह्याचे स्वरूप व शिक्षेची तीव्रता, साक्षी-पुराव्यांशी छेडछाड होण्याची वाजवी भीती आणि जनतेचे व्यापक हित लक्षात घेत आरोपीची तात्पुरत्या जामीनावर सुटका करण्याचे कोणतेही न्याय्य कारण दिसत नाही,’ असेही न्यायालयाने आदेशात नमूद केले आहे..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.