Pune Traffic : धनकवडी परिसरातील वाहतूक कोंडी सुटणार ? वाहतूक विभागाचा पाहणी दौरा

Pune Traffic - धनकवडी परिसरातील भारतीय विद्यापीठ भागाच्या मागील बाजूकडे आंबेगाव पठार कडे जाणाऱ्या रस्त्यावरील त्रिमूर्ती चौकातील वाहतूक कोंडीची समस्या गेल्या अनेक दिवसांपासून होत आहे.

या संदर्भात शुक्रवारी संध्याकाळी धनकवडी-सहकारनगर कार्यालयाच्या सहाय्यक आयुक्त सुरेखा भणगे व भारतीय विद्यापीठ वाहतूक विभागाचे सहाय्यक पोलीस निरीक्षक प्रशांत कणसे यांनी त्रिमूर्ती चौकातील वाहतूक समस्या सोडवण्याकरिता पाहणी दौरा आयोजित केला.

यावेळी शाखा अभियंता व्यंकटेश इंद्राक्षे ,कनिष्ठ अभियंता चंद्रकांत राऊत ,सुवर्णा शिंदे, प्रशांत परदेशी, आशिष जमदाडे तसेच वाहतूक विभागाचे कर्मचारी उपस्थित होते. यावेळी स्थानिक नागरिक उपस्थित होते.

त्रिमूर्ती चौक ते चंद्रभागानगर रस्ता या भागातील रस्त्याच्या बाजूकडील अतिक्रमण, साईड पट्टे, पार्किंग बोर्ड, व दुकानांच्या समोरील अनधिकृत पार्किंग, रस्त्याच्या बाजूने फुटपाथ, सम विषम दिवस पार्किंग, झेब्रा क्रॉसिंग, यासंदर्भात चर्चा होऊन पाहणी करण्यात आली.यावेळी सहाय्यक आयुक्त भनगे म्हणाल्या, अनेक वर्षापासून येथे होत असलेल्या वाहतूक कोंडीबाबत तांत्रिकबाबीचा विचार करून लवकर सोडवण्यात येईल.

त्या संदर्भात १२ मीटर लांबीच्या वरील रस्त्यांविषयी महानगरपालिकेच्या मुख्य इमारतीतील पथ विभाग यांच्या सहकार्याने या रस्त्यावरील व चौकातील अतिक्रमणे, फुटपात, साईड पट्ट्या, याविषयी बैठक घेऊन त्या संदर्भात निर्णय घेण्यात येऊन लवकरात लवकर वाहतूक समस्या सोडवण्यासाठी पाऊल उचलण्यात येईल.धनकवडी कडून भारती विद्यापीठाकडे जाण्याकरता व पुढे दत्तनगर चौक कडे जाण्यासाठी या मुख्य त्रिमूर्ती चौकातून जावे लागते.

तसेच भारती विद्यापीठ मागील परिसरात अनेक विद्यार्थी राहत असल्याने रस्त्यावर चालणाऱ्याची संख्या अधिक असते. तसेच वाहनाची संख्याही खूप असते, त्यात अरुंद रस्ता व रस्त्याच्या बाजूने असणारी दुकाने आणि दुकानामध्ये जाणारी ग्राहक त्यांच्या वाहने थेट रस्त्यावर लावत असल्याने वाहतूक कोंडीची समस्या निर्माण होते. काही जण सार्वजनिक जागेवर स्टॉल उभे आहेत.