Pune Accident : पुणे - सोलापुर राष्ट्रीय महामार्गावर डाळज क्र. १ येथे अपघात

भिगवण : पुणे सोलापुर राष्ट्रीय महामार्गावर डाळज क्र. १(ता.इंदापुर) येथे वाहन चालकांचे वाहनावरील नियंत्रण सुटुन झालेल्या भीषण अपघातांमध्ये लातुर येथून नातेवाईकाच्या गृहप्रवेश कार्यक्रमासाठी पुण्याला निघालेल्या तिघांचा जागीच मृत्यू झाला तर एक जण गंभीर जखमी झाला आहे. हा अपघात शुक्रवारी(ता.२४) पहाटे तीनच्या सुमारास घडला.

संदिप राजाभाऊ माळी( वय ३५), बालाजी केरबा तिडके(वय.४८), सरस्वती राजाभाऊ माळी(वय.६१ रा. सर्व रा. गातेगाव ता.जि. लातुर) अशी अपघातामध्ये मयत झालेल्या व्यक्तीची नावे आहेत तर चंद्रकांत रामकिसन गवळी(वय. ५४ रा. दिपज्योतीनगर ता. जि लातुर) हे अपघातामध्ये गंभीर जखमी झाले आहेत.

या प्रकरणी चंद्रकांत गवळी यांनी फिर्याद दिली आहे. याबाबत पोलिसांनी दिलेली माहिती अशी यातील फिर्यादी व त्यांचे नातेवाईकांसह त्यांचे होणाऱ्या जावयाच्या गृह प्रवेश कार्यक्रमासाठी लातुरहुन पुणे येथे त्यांचेकडील स्वीफ्ट मोटार कार(क्र. एम.एच. ४३ बी.एन. १४०२) मधुन निघाले होते.

पुणे सोलापुर राष्ट्रीय महामार्गावर इंदापुर तालुक्यातील डाळज क्र. १ येथे चालकाने त्याचेकडील वाहन भरधाव वेगात व वाहतुकीच्या नियमांकडे दुर्लक्ष करुन चालविल्यामुळे त्याचे वाहनावरील नियत्रंण सुटले व स्वीफ्ट मोटार कारची पलटी होऊन झालेल्या अपघातामध्ये तिघांचा जागीच मृत्यू झाला तर एक जण गंभीर जखमी झाला आहे. जखमीवर येथील खासगी रुग्नालयांमध्ये उपचार करण्यात येत आहे.

या प्रकरणी वाहन चालकाविरुध्द गुन्हा दाखल करण्यात आला आहे. अधिक तपास भिगवण पोलिस ठाण्याचे सहाय्यक पोलिस निरीक्षक दिलीप पवार यांचे मार्गदर्शनाखाली पोलिस उपनिरिक्षक विनायक दडस-पाटील करीत आहेत.