पुणे : सुवर्णयुग सहकारी बँकेचे नवीन संचालक मंडळ जाहीर

पुणे : श्रीमंत दगडूशेठ हलवाई सार्वजनिक गणपती ट्रस्ट अंतर्गत सुवर्णयुग सहकारी बँकेची निवडणूक बिनविरोध पार पडली. बँकेच्या २०२२ ते २०२७ या पाच वर्षांच्या कालावधीसाठी नवीन संचालक मंडळाची नियुक्ती करण्यात आली.

ट्रस्टचे विश्वस्त आणि महापालिकेचे स्थायी समिती अध्यक्ष हेमंत रासने, बँकेचे अध्यक्ष राजेंद्र सूर्यवंशी, राजाभाऊ चव्हाण, गणपती ट्रस्टचे कोषाध्यक्ष महेश सूर्यवंशी, उपाध्यक्ष सुनील रासने, सुवर्णयुग तरुण मंडळाचे अध्यक्ष प्रकाश चव्हाण यांच्या पुढाकाराने ही निवडणूक बिनविरोध पार पडली.

नवनियुक्त संचालक मंडळामध्ये हेमंत रासने, राजेंद्र सूर्यवंशी, राहुल चव्हाण, अमर कोद्रे, बाळकृष्ण सातपुते, नितीन राऊत, राजेंद्र पायमोडे, इंद्रजित रायकर, सुनील जाधव यांसह राखीव विभागातून महिलांमध्ये शोभा गोडसे, आसावरी रायकर आणि पुरुष राखीव गटातून चंद्रकांत मंचे, सुनील माने यांची नियुक्ती झाली आहे. सहकार विभागाकडून शाहूराज हिरे यांनी निवडणूक निर्णय अधिकारी म्हणून काम पाहिले.

बँकेचे अध्यक्ष सूर्यवंशी म्हणाले, सुवर्णयुग सहकारी बँकेची स्थापना १९७३ मध्ये झाली. बँकेच्या पुणे जिल्ह्यात २० ठिकाणी शाखा आहेत. बँकेच्या ८५० कोटी रुपयांच्या ठेवी असून, ६५० कोटी रुपयांची कर्जे आहेत. सुवर्णमहोत्सवी वर्षात बँकेतर्फे विविध उपक्रम राबविले जाणार आहेत. त्यामध्ये प्रामुख्याने समाजातील कमकुवत घटकांसाठी व गरिबांसाठी योजना राबविणार आहोत.