पुणे : ...अन्‌ झाडांनी घेतला मोकळा श्वास!

पुणे : चमत्कार सत्य शोधन दिनाचे औचित्य साधून महाराष्ट्र अंधश्रद्धा निर्मूलन समितीच्या पुणे जिल्हा शाखेच्या कार्यकर्त्यांनी होळकर पूल परिसरातील चार झाडांना खिळ्यांपासून मुक्त केले. यातून पारंपरिक अंधश्रद्धांचे जोखड उखडून फेकण्याचा प्रयत्न करण्यात आला.

होळकर पुलाजवळील म्हसोबा मंदिर परिसरातील सहा झाडांना काळ्या बाहुल्या, दाभण, लिंबू, फोटो करणी करण्यासाठी किंवा करणी काढण्यासाठी झाडावर लावलेले साहित्य समितीच्या कार्यकर्त्यांनी मंगळवारी दुपारी काढून टाकले. एका झाडातून तर तब्बल ६० खिळे बाहेर काढण्यात आले. झाडांवर लावलेल्या सुमारे ४० बाहुल्याही कचऱ्याच्या कुंडीत फेकून देण्यात आल्या. समितीच्या कार्यकर्त्या नंदिनी जाधव म्हणाल्या, ‘‘समाजाच्या डोक्यावर बसलेले अंधश्रद्धेचे भूत आता गाडून टाकण्याची गरज आहे. झाडांना बाहुल्या लावून कोणाचे वाईट होत नसते. त्यातून पर्यावरणाची हानी होते. त्यामुळे अंधश्रद्धेच्या विरोधात तरुणांनी काम करण्याची गरज आहे.’’

या प्रसंगी मिलिंद देशमुख, ॲड. साधना बाजारे, श्रीराम नलावडे, भगवान काळभोर, राजु जाधव, विजय सुर्वे, सुभाष सोलंकी, मनोहर शेवकरी यांच्यासह समितीच्या पुणे, पिंपरी चिंचवड, खेड, चाकण शाखेचे कार्यकर्ते उपस्थित होते.

अंधश्रद्धा निर्मूलनाचा कायदा संमत होऊन पाच वर्षे झाली, तरी या कायद्याचा धाक जनमानसात निर्माण करण्यात पोलिसांना अद्याप यश आले नाही. याबाबत समाजात जागरूकता निर्माण करण्यासाठी संघटित प्रयत्नांची गरज आहे.

- नंदिनी जाधव, कार्यकर्त्या, अंधश्रद्धा निर्मूलन समिती