Pune news : मोरेवस्तीवरील इंगवलेंनी फुलविली टेरेसवर भाजीपाला-फुलेझाडी

उंड्री : नोकरी-व्यवसायानिमित्त शहरवासिय झाल्यानंतर शेतीपासून काहीसे आपण दूर आलो आहे. मात्र, तरीसुद्धा भाजीपाला, फुलझाडांवरचे प्रेम काही कमी झाले नाही. स्वतः पिकविलेला भाजीपाला आणि फुलझाडे काही औरच आनंद देतात. भरपूर शेती नसली तरी फ्लॅटमधील गॅलरी किंवा टेरेसवर फुलझाडीबरोबर शेतमाल पिकविण्याची शक्कल महिलांनी लढविली आहे. त्यातीलच मोरेवस्ती (ता. हवेली, जि. पुणे) येथील शालन इंगवले यांनी घराच्या छतावर दररोजच्या वापरासाठीची ताजा भाजीपाला आणि देवपुजेसाठी फुलझाडे लावली आहेत.

इंगवले म्हणतात वांगी, टोमॅटो, हिरवी मिरची, कोथिंबीर, शेवंती, गोकर्णी, गवती चहा, गुलाबांची लागवड केली आहे. दररोज ताजा भाजीपाला मिळतो, देवपुजेला फुलेही मिळतात. एवढेच नव्हे, तर छान भाजीपाला आणि फुलझाडांना पाणी देत देखभाल करताना व्यायाम होतो, वेळही छान जातो, त्यांना काय हवं काय नको हेही पाहता येतो.

हवामानानुसार पाणी कमीजास्त द्यावे, माती बदलते, शेणखतचा वापर करून छान शेती फुलताना पाहयला मिळत आहे. ऐनवेळी घरी कोणी आले, तर पोहे करण्यासाठी पटकन टेरेसवरून जाऊन हिरव्या मिरच्या आणि कोथिंबीर आणता येते. कृत्रिम स्प्रे मारण्यापेक्षा फुलांचा सुगंध परिसरात पसरतो, त्यामुळे वातावरण आनंददायी होते, ये-जा करणारेही फुलझाडांविषयी विचारपूस करतात तेव्हा मनोमन समाधान वाटते. कोरोना महामारीमध्ये प्रत्येकाने ऑक्सिजनचे महत्त्व जाणले आहे.

त्यामुळे स्वच्छ आणि शुद्ध ऑक्सिजनसाठी प्रत्येकाने गॅलरी, टेरेसवर छोटीशी बाग फुलवायला हवी. टेरेस गार्डनमुळे टेरेसही स्वच्छ राहते, शुद्ध हवा मिळते. स्वतःची शेती फुलताना पाहून मनोमन समाधान मिळत आहे. प्रत्येकाने टेरेस, बाल्कनी, पार्किंगच्या छोट्याशा जागेत बाग फुलवून कचरा जिरविण्याची नवी संकल्पना अवलंबिली पाहिजे, असे त्यांनी सांगितले.