पुणे : मुलावर ओरडली म्हणून पत्नीला पायरीवरून ढकलले

पुणे - लहान मुलाने (Child) मस्ती केल्याने त्यावर ओरडली (Shouted) म्हणून पतीने (Husband) पत्नीला (Wife) लाथा-बुक्क्यांनी जबर मारहाण (Beating) केली. तसेच तिला पायरीवरून ढकलून (Pushed) दिले. हा प्रकार सातवनगरमध्ये घडला. याबाबत २७ वर्षीय विवाहितेने दिलेल्या फिर्यादीवरून पतीसह सासरच्यांवर वानवडी पोलिस ठाण्यात गुन्हा (Crime) दाखल करण्यात आला आहे.

पतीने केलेल्या मारहाणीत पत्नीच्या गुडघ्याला व अंगाला मुका मार लागला आहे. सातवनगर-हांडेवाडी रस्ता येथे २५ फेब्रुवारी २०१२ ते २७ जानेवारी २०२२ दरम्यान हा प्रकार घडला. पती कुणाल शांताराम कचरावत, सासू लंका शांताराम कचरावत, दीर रामदास शांताराम कचरावत आणि जाव पार्वती रामदास कचरावत यांच्यावर गुन्हा दाखल करण्यात आला आहे. याबाबत पोलिसांनी दिलेल्या माहितीनुसार, फिर्यादी सासरी नांदत असताना पतीने शारीरिक आणि मानसिक त्रास देत वेगवेगळ्या कारणासाठी पैशाची मागणी करून पत्नीचा छळ केला. मारून टाकण्याची धमकी देऊन क्रूर वागणूक देत जाच केल्याने तिला जगणे असह्य केले.

२७ जानेवारी रोजी रात्री १० वाजता फिर्यादी यांच्या लहान मुलाने मस्ती केल्याने फिर्यादी त्यावर ओरडल्या. त्यामुळे पतीने त्यांना लाथाबुक्क्यांनी जबर मारहाण केली. या मारहाणीत पायरीवरून पडल्याने गुडघ्याला व अंगाला मुका मार लागला. वानवडी पोलिस ठाण्याचे पोलिस उपनिरीक्षक व्ही. व्ही. वाडकर या गुन्ह्याचा तपास करीत आहेत.

नातेवाईकांनी दाबला गळा -

पतीच्या नातेवाईकांनी ‘तू मरून जा नाही तर आम्ही तुला सोडणार नाही,’ असे म्हणत फिर्यादी यांच्या अंगावर सुरू घेऊन धावून येत गळा दाबला. त्यामुळे फिर्यादी बेशुद्ध पडल्या. त्यावेळी त्यांचा मृत्यू झाला, असे वाटल्याने आरोपींनी फिर्यादी यांना बेडरूममध्ये आणून टाकले, असे फिर्यादीत नमूद आहे.