पुणे महापालिकेकडून लसीकरणासाठी करणार संगणक खरेदी

पुणे - शहरातील लसीकरण केंद्रावर (Vaccination Center) फर्निचर व इतर कामांसाठी लाखो रुपयांचा खर्च सुरू असताना आता त्या ठिकाणी नवे संगणक (Computer) उपलब्ध करून देण्यासाठी ३० लाख रुपयांची निविदा (Tender) काढली आहे. क्षेत्रीय कार्यालयांच्या स्तरावरील शाळांमधील संगणक वापरून लसीकरण केले जात असताना आता यासाठी संगणक खरेदी केली जाणार आहे. (Purchase of Computer for Vaccination from Pune Municipal Corporation)

शहरामध्ये गेल्या सहा महिन्यांपासून कोरोना प्रतिबंधक लसीकरण सुरू आहे. त्यासाठी महापालिकेच्या आरोग्य विभागाने सुरूवातीला १२१ केंद्र सुरू केली होती. मात्र, तेथे राजकीय वाद सुरू झाल्याने प्रत्येक नगरसेवकाला एक लसीकरण केंद्र सुरू करून देण्यात आले. शहरात सध्या लसीकरण केंद्रांची संख्या १८१ आहे. प्रशासन गरजेनुसार जास्त केंद्र सुरू करत असून शहरात सध्या २०० शासकीय केंद्र आहेत. लसीकरण झालेल्या नागरिकांची नोंदणी ऑनलाइन होत असल्याने प्रत्येक केंद्रावर एक संगणक, इंटरनेट कनेक्शन आणि विजेची व्यवस्था महापालिकेला करावी लागत आहे. या केंद्रांवर सध्या महापालिका व नगरसेवकांच्या माध्यमातून संगणकाची व्यवस्था केली जात आहे. या पार्श्वभूमीवर महापालिका प्रशासनाने मध्यवर्ती भांडार विभागातर्फे संगणक खरेदीसाठी निविदा काढली असून याबाबतचा प्रस्ताव स्थायी समितीसमोर ठेवला आहे.

एक संगणक ४८ हजारांचा

लसीकरण केंद्रांसाठी ४६ संगणक खरेदी करणार आहेच, पण त्याचसोबत प्रिंटर व युपीएसही खरेदी केले जातील. यामध्ये प्रती संगणकाची किंमत ४८ हजार आणि प्रिंटरची १४ हजार ९९० रुपये इतकी आहे. युपीएसची किंमत २ हजार १०० रुपये इतकी आहे.

लसीकरण केंद्रांसाठी संगणक खरेदीची निविदा काढली आहे. सध्या लसीकरण केंद्रांवर शाळा व इतर विभागातील जुने संगणक वापरले जातात.

- ज्ञानेश्‍वर मोळक, प्रमुख, मध्यवर्ती भांडार