रिलायन्सचा रुग्णवाहिकांना मोठा दिलासा, करणार मोफत डिझेलपुरवठा

बारामती : रिलायन्सच्या वतीने देशभरात रुग्णवाहिका, ऑक्सिजन टॅंकर तसेच ऑक्सिजन सिलेंडरची वाहतूक करणाऱ्या वाहनांना मोफत डिझेल पुरवठा करण्यात येणार आहे. बारामतीतील रिलायन्सच्या पेट्रोल पंपावर कालपासून ही योजना कार्यान्वित करण्यात आल्याची माहिती रोहित सराफ यांनी दिली.

कोरोनाच्या काळात सामाजिक बांधिलकीची जाणीव ठेवत रिलायन्स कंपनीने देशभरासाठी हा निर्णय घेतल्याची माहिती देण्यात आली. बारामतीत उपविभागीय अधिकारी यांचे पत्र असलेल्या रुग्णवाहिका, ऑक्सिजन टँकर तसेच ऑक्सिजन सिलिंडर्सची वाहतूक करणा-या वाहनांना एका वेळेस कमाल 50 लिटर डिझेल पुरविले जाणार आहे.

कोरोनावर मात करण्यासाठी समाजातील विविध घटक वेगवेगळ्या मार्गांनी मदतीचा हात पुढे करत आहे. आता रिलायन्सने थेट रुग्णवाहिका व ऑक्सिजनवाहतूक करणा-या वाहनांना कमाल 50 लिटर डिझेल मोफत देण्याचा मोठा निर्णय घेत दिलासा देण्याचा प्रयत्न केला आहे. या निर्णयाचा फायदा अप्रत्यक्षपणे रुग्णांनाही होईल व इंधनावरचा रुग्णवाहिकांचा खर्चही कमी होणार आहे.

कालपासून बारामतीत ही सुविधा देण्यात आली आहे. रुग्णवाहिकांमार्फत रुग्णांची ने आण केली जाते, ही बाब विचारात घेत रिलायन्सने हा निर्णय घेतला आहे. कंपनीच्या वतीने जो पर्यंत ही योजना राबवली जाणार आहे तो पर्यंत या वाहनांना मोफत डिझेल पुरवठा केला जाणार असल्याची माहिती रोहित सराफ यांनी दिली.