वडगाव निंबाळकरमधील रस्त्याच्या अपुऱ्या कामामुळे अपघाताचा धोका

वडगाव निंबाळकर, ता. २३ ः नीरा-बारामती मार्गावर रस्ता रुंदीकरणाचे काम ठिकठिकाणी सुरू आहे. वडगाव निंबाळकर येथील रस्ता रुंदीकरणानंतर साइडपट्ट्या न भरल्यामुळे अपघात होत आहेत.

येथील जिल्हा परिषद प्राथमिक शाळेसमोर साखर वाहतूक करणारा मालवाहतूक ट्रक रस्त्यावरून साइडपट्टीवर उतरला तीव्र उतार असल्यामुळे चालकांने प्रसंगावधान राखून वाहनावर नियंत्रण मिळवत, वाहन रोखले. यामुळे अपघाताचा धोका टाळला. गेल्या दोन महिन्यांत अनेक वेळा या ठिकाणी वाहने रस्त्याखाली जाण्याचे प्रकार घडत आहेत. दुचाकी वाहनचालक अपघातामुळे जखमी होत आहेत. नीरा-बारामती मार्गावरील ढोले वस्ती ते वडगाव निंबाळकर या मार्गाचे रुंदीकरणाचे काम झाले. यामध्ये रस्त्याच्याकडेची झाडे काढली. परंतु, काही ठिकाणी रुंदीकरणानंतर साइडपट्ट्या मुरूम भरून घेणे गरजेचे होते. परंतु, साइडपट्टीचे काम झाले नाहीत, परिणामी सातत्याने अपघात होत आहेत.
दरम्यान, जिल्हा परिषद शाळा आणि माध्यमिक शाळेजवळ रस्त्याचे रुंदीकरण गरजेचे होते. परंतु, सुमार दर्जाचे काम आणि नेमलेल्या सार्वजनिक बांधकाम विभागाच्या अधिकाऱ्यांनी वेळोवेळी भेट न दिल्यामुळे कामात चालढकल करण्यात आल्याचा आरोप पालकांमधून होत आहे.