भोर (पुणे) : भोर- महाड मार्गावरील वरंधा घाटातील भोरच्या हद्दीतील रस्त्याच्या कोसळलेल्या संरक्षक भिंतीचे काम जोरात सुरू आहे. पुढील आठवडाभरात हे काम पूर्ण होईल. त्यामुळे वरंधा घाटातील भोर हद्दीतील रस्त्यावरील वाहतूक सुरू होणार आहे. मात्र, घाटाच्या महाड बाजूकडील रस्त्याचे काम होण्यास काही महिने लागणार असून, भोर-महाड मार्ग मोठ्या गाड्यांसाठी तूर्तास सुरू होणार नाही.
वरंधा घाटात या वर्षी जुलै महिन्यात आणि ऑगस्ट महिन्यात दोन ठिकाणी घाटातील भोर बाजूकडील संरक्षक भिंत कोसळली आहे. जुलै महिन्यात कोसळलेली भिंत पुन्हा उभारली आहे. मात्र, ऑगस्ट महिन्यात घाटमाथ्यावरील वाघजाई मंदिराशेजारी कोसळलेली संरक्षक भिंत उभारण्याचे काम सुरू आहे. या ठिकाणी सुमारे 70 मीटर लांबीच्या संरक्षक भिंतीचे काम सुरू आहे. खालील बाजूस कडा व खोल दरी आहे. त्यामुळे येथील बांधकाम करण्यास उशीर होत आहे. परंतु, पाऊस कमी झाल्यास पुढील आठ दिवसांत हे काम पूर्ण होऊन भोर हद्दीपर्यंत सर्व गाड्यांची वाहतूक सुरू होईल. याशिवाय घाटातील हिर्डोशी येथील खचलेल्या पुलाचे कामही पूर्ण करण्यात आले असल्याचे भोरच्या सार्वजनिक बांधकाम विभागाचे उपअभियंता आर. एल. ठाणगे यांनी सांगितले.
भोर-महाड मोठ्या गाड्या बंद
वरंधा घाटात 13 ऑगस्टला महाडच्या हद्दीतील मोठी संरक्षक भिंत कोसळल्याने वाहतूक काही दिवस बंद होती. परंतु, या मार्गावरून सध्या दुचाकी व मोटारींची वाहतूक सुरू आहे. महाडच्या बाजूचे बांधकाम पूर्ण होण्यास काही महिन्यांचा कालावधी लागणार आहे. त्यामुळे भोर- महाड मार्गावरील मोठ्या गाड्यांची वाहतूक बंद राहणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.