देहूत बीजसोहळ्यासाठी वैष्णवांची मांदियाळी

देहू - जगद्‌गुरू संत श्री तुकाराम महाराज बीजसोहळा बुधवारी (ता. ११) होत आहे. या सोहळ्यासाठी राज्यभरातून भाविक येथे दाखल झाले आहेत. भाविकांच्या स्वागतासाठी देहूनगरी सज्ज झाली असून, भाविकांना अधिकाधिक सेवासुविधा देण्यासाठी संस्थान आणि ग्रामपंचायत प्रशासनाची युद्धपातळीवर लगबग सुरू आहे.

ताज्या बातम्यांसाठी डाऊनलोड करा ई-सकाळचे ऍप

देहूत विविध भागांतून दिंड्या दाखल झाल्या आहेत. इंद्रायणीचा काठ भाविकांनी फुलून गेला आहे. संत तुकाराम महाराज संस्थानचे अध्यक्ष मधुकर महाराज मोरे, संजय महाराज मोरे म्हणाले, की संस्थानने मुख्य देऊळवाडा, वैकुंठगमन स्थान येथील मंदिराची विद्युत रोषणाई, रंगरंगोटी केली आहे. मंदिरालगतच्या परिसरात स्वच्छतेसाठी जादा कर्मचारी नियुक्त केले आहेत. मुख्य देऊळवाड्यात ३२ तर कॅमेरे बसविण्यात आले असून, वैकुंठगमन स्थान मंदिर परिसरातही कॅमेऱ्यांची नजर असणार आहे. बुधवारी (ता. ११) पहाटे बीजसोहळ्याच्या कार्यक्रमाला प्रारंभ होईल.

देहू ग्रामपंचायतीच्या वतीने गावातील तसेच नदीचा घाट परिसराची स्वच्छता करण्यात आली आहे. माळवाडी, देहू, विठ्ठलवाडी, गाथा मंदिर परिसरात औषध फवारणी केली आहे. भाविकांना पिण्याचे पाणी उपलब्ध व्हावे, यासाठी २४ तास पाणी व्यवस्था आणि टॅंकर उपलब्ध करून देण्यात आले आहेत. देऊळवाडा आणि वैकुंठगमन स्थान परिसरात चोख पोलिस बंदोबस्त तैनात आहे. पीएमपीएलच्या बससाठी गावाबाहेर वाहनतळ उभारला आहे. वीज वितरण कंपनीच्या वतीने चोवीस तास वीजपुरवठा देण्यासाठी नियोजन केले आहे. सध्या सुरू असलेल्या कोरोना व्हायरसच्या पार्श्वभूमीवर चोविस तास वैद्यकीय सेवा प्राथमिक आरोग्य केंद्रात उपलब्ध करून देण्यात आलेली आहे.