शिरूरच्या पोलिसांची दबंगगिरी, तीन तासांत दरोडेखोरांच्या अशा आवळल्या मुसक्या 

शिरूर (पुणे) :  पोकलेन घेऊन जाणारा कंटेनर अडवून तिघांना मारहाण करत मोबाईल व वाहनांच्या बॅटऱ्या चोरून पळून जाणाऱ्या पाच जणांना शिरुर पोलिसांनी अण्णापूर व मलठण येथील ग्रामसुरक्षा दल आणि स्थानिक ग्रामस्थांच्या मदतीने जेरबंद केले. 

पुण्यामध्ये आजपासून नवीन नियम लागू...

शिरूर- पाबळ रस्त्यावर आमदाबाद फाट्याजवळ बुधवारी (ता. 1) रात्री साडेदहाला हा दरोड्याचा प्रकार घडल्यानंतर पोलिसांनी तातडीने तपासाची चक्रे फिरवून एकच्या सुमारास दरोडेखोरांच्या मुसक्‍या आवळल्या. अविनाश शहाजी कारखिले (रा. राळेगण थेरपाळ, ता. पारनेर, जि. नगर), योगेश पुंडलिक मदगे व सुनील अशोक घावटे (दोघे रा. शिरूर), सचिन कारभारी मदगे (रा. शिरूर) व रवी बाळशिराम झंजाड (रा. अण्णापूर, ता. शिरूर) अशी अटक केलेल्यांची नावे असून, शिरूर न्यायालयाने त्यांना गुरुवारी दहा दिवसांची पोलिस कोठडी दिली. गुन्ह्यात वापरलेली मोटार पोलिसांनी जप्त केली असून, वीस हजार रुपये किमतीच्या बॅटऱ्या, दहा हजारांचे मोबाईल व पाच हजार रुपयांचा ऐवज आरोपींकडून हस्तगत केला. 

कोरोनामुळे 78 टक्के लघू, सूक्ष्म उद्योगांचे काम बंद 

कंटेनर चालक दादा शिवाजी साळवे (रा. राशीन, ता. कर्जत, जि. नगर) यांनी दिलेल्या फिर्यादीनूसार, ते कंटेनरमध्ये पोकलेन मशिन घेऊन नारायणगावहून कर्जतकडे जात होते. शिरूर- पाबळ रस्त्यावर संशयित दरोडेखोरांनी आमदाबादजवळील मळगंगा लॉजनजिक स्कोडा मोटार आडवी घालून त्यांना थांबविले. साळवे व त्यांच्यासोबत असलेले दीपक रमेश लव्हे (रा. राशीन, ता. कर्जत) व पोकलेन ऑपरेटर अनिल रामजीवन चौधरी (रा. नगर) यांच्याकडे पैशांची मागणी करीत मारहाण केली. त्यांच्याकडील मोबाईल, वाहनांच्या बॅटऱ्या व व्हील पान्हे घेऊन ते पळून गेले. 

जिल्ह्यात हरघर गोठे, घरघर गोठे...

याबाबत माहिती मिळताच पोलिस निरीक्षक प्रवीण खानापुरे, पोलिस उपनिरीक्षक गणेश जगदाळे, तसेच मुकुंद कुडेकर, जितेंद्र मांडगे, करणसिंग जारवाल, प्रवीण पिठले, राजेंद्र गोपाळे, सागर गुणवरे व यु. एस. जंगम या पोलिस पथकाने तातडीने घटनास्थळी धाव घेतली. खानापुरे यांनी जाताना मलठण, अण्णापूर, टाकळी हाजी, रामलिंग, आमदाबादच्या ग्रामसुरक्षा दलाच्या जवानांशी संपर्क साधला. काही ग्रामस्थांना कळवून तेथे पोलिसही पाठविले. ग्रामस्थांनी वाहने रस्त्यावर लावून नाकेबंदी केली. तरीही नाकेबंदी तोडून पळून जाण्याचा प्रयत्न करणाऱ्या या दरोडेखोरांना पोलिसांनी अण्णापूरजवळ जेरबंद केले. 

पुण्याच्या बातम्या वाचण्यासाठी येथे ► क्लिक करा

सश्‍याची शिकार 
दरोडेखोरांकडून जप्त केलेल्या स्कोडा मोटारीची झडती घेताना चोरीच्या मालाबरोबरच; एक मृत रानटी ससा आढळून आला. याबाबत पोलिसांनी कसून चौकशी केली असता, संबंधितांनी शिकार करून त्याला मारल्याचे निष्पन्न झाले. त्यामुळे दरोड्याबरोबरच; त्यांच्याविरूद्ध दुर्मिळ जंगली प्राण्याच्या बेकायदा शिकारीप्रकरणीही गुन्हा दाखल केला.