#mynewspapervendor मंचरच्या शिंदे यांची सहा कोटींची उलाढाल 

मंचर (ता. आंबेगाव) : येथील बबनराव नामदेवराव शिंदे यांनी आंबेगाव तालुक्‍यातील मंचर ते डिंभे या मार्गावर असलेल्या गावांमध्ये "सकाळ' पेपरचे पार्सल पोचविण्याचे काम 17 वर्ष केले. संपर्क वाढल्याने पशुखाद्य विक्रीचा व कांदा बटाट्याचा व्यवसाय त्यांनी सुरू केला. सुरवातीला खडतर प्रवास करत असताना भाड्याने घेतलेल्या घराचेही वेळेवर भाडे देता येत नव्हते. मात्र आज अविरत कष्टाच्या बळावर त्यांनी टोलेजंग बंगला बांधला आहे. "महालक्ष्मी ट्रेडर्स' व "महालक्ष्मी ट्रेडिंग' या त्यांच्या कंपन्यांची वार्षिक उलाढाल आता 6 कोटींच्या पुढे असून त्यातून 20 जणांना रोजगार मिळाला आहे. 

खेड तालुक्‍यातल्या जऊळके बुद्रुक गावातून आलेल्या शिंदेंनी वाणिज्य शाखेची पदवी घेतली. पण कुठेही नोकरी न मिळाल्यामुळे ते पत्नीसह रोजगारासाठी 1988 मध्ये मंचरला आले. "सकाळ'च्या एजंटकडून अंक घेऊन त्याचे छोट्या विक्रेत्यांना वाटप करणे सुरू केले. तसेच मंचर ते डिंभे या मार्गावरील अंकाचे पार्सल वृत्तपत्र विक्रेत्यांकडे पोचविण्याचे काम केले. पशुखाद्य विक्रीचा व्यवसाय 1995 मध्ये सुरू केला. तसेच कांदा बटाटा व तरकारी भाजी खरेदी विक्रीचा व्यवसायही सुरू केला. व्यवसायाचा व्याप वाढल्याने 2005मध्ये त्यांनी पार्सल वाहतुकीचे काम बंद केले. दरम्यानच्या काळात त्यांनी मुलगा नितीन व मयूर यांना अनुक्रमे आयटी इंजिनिअर व कृषी पदवीधर केले.