निर्माल्य संकलनासाठी ‘स्वच्छ’ची बुधवारपासून पुण्यात विशेष मोहीम

पुणे : गणेशोत्सवाच्या पार्श्वभूमीवर पुणे महानगरपालिका, स्वच्छ पुणे आणि कमिन्स इंडिया हे एकत्रितपणे 'निर्माल्य टू निसर्ग ' शहरात यंदाही राबवित आहेत. याअंतर्गत नागरिकांकडून निर्माल्य संकलन करण्यास 'स्वच्छ'च्या कचरा वेचक बुधवारपासून (ता. १५) सुरवात करणार आहेत. हे निर्माल्य महापालिका नैसर्गिकरित्या जिरवणार आहे.

गणेशोत्सवात भाविकांनी वाहिलेल्या फुले, हार, दुर्वा यांसारख्या नैसर्गिकरित्या जिरवल्या जाऊ शकणाऱ्या निर्माल्याचे योग्य मार्गाने विघटन व्हावे आणि त्यातून पर्यावरणाचे संवर्धन व्हावे, या उद्देशाने शहरात गेल्या ११ वर्षांपासून गणेशोत्सवादरम्यान निर्माल्य संकलन केले जाते. यामध्ये स्वच्छ संस्थेचे कचरा वेचक नागरिकांकडून निर्माल्य गोळा करतात व मनपाकडे प्रक्रियेसाठी देतात. कमिन्स इंडियाच्या माध्यमातून निर्माल्य गोळा करण्यासाठी लागणारी पोती कचरा वेचकांना उपलब्ध करून दिली जातात.

उपक्रमाविषयी माहिती देताना स्वच्छ संस्थेचे आलोक गोगटे म्हणाले,‘‘गणेशोत्सव हा पुण्यातील सांस्कृतिक दृष्ट्या महत्वाचा उत्सव आहे. त्याचे सांस्कृतिक महत्व जपण्यासोबत शहराच्या पर्यावरणाचे देखील संवर्धन ‘निर्माल्य टू निसर्ग’ सारख्या उपक्रमातून होत आहे. यंदा हा उपक्रम १२ सप्टेंबर रोजी सुरु झाला आहे. नागरिकांनी त्याला मोठा प्रतिसाद दिला आहे. गेल्या तीन वर्षात, पुणे महानगरपालिकेसोबत काम करून २८६ टन निर्माल्य यशस्वीपणे गोळा करून ते इतर प्रकारच्या कचरा व्यवस्थापन प्रणालीत जाण्यापासून स्वच्छच्या कचरा वेचकांनी रोखले आहे.

पूर्वी कचरा वेचक नदीकाठी थांबून निर्माल्य गोळा करत असत. परंतु, कोव्हिडच्या प्रादुर्भावानंतरही न थांबता दारोदारी जात हा उपक्रम राबविण्यात कचरा वेचकांना मोठे यश मिळाले आहे." ११५ व २० सप्टेंबर रोजी देखील आपल्याकडील निर्माल्य कचरा वेचकांना द्यावे असे आवाहन 'स्वच्छ' तर्फे करण्यात आले आहे.

नागरिकांनी असे करावे

• घरातील निर्माल्याचे वेगळे संकलन करावे

• १५ ते २० सप्टेंबर दरम्यान स्वच्छचे कचरा वेचक ते संकलन करणार

• निर्माल्यामध्ये केवळ हार, पाने, फुले एवढ्याच गोष्टींचा समावेश असावा.

• प्लास्टिक, थर्माकोल, कापडी वस्तू किंवा तसबिरी, मुर्त्या किंवा त्यांचे अवशेष तसेच कुठलेही खाद्यपदार्थ निर्माल्यात नको.

• निर्माल्य नदी, विहिरी किंवा नाल्यांमध्ये टाकू नका