Baramati : बारामती पर्यटन केंद्र विकसीत होण्यासाठी प्रयत्नशील - अजित पवार

बारामती - आगामी काळात बारामती पर्यटन केंद्र म्हणून विकसित व्हावे, या साठी मी व माझे सहकारी प्रयत्नशील असल्याची माहिती विरोधी पक्षनेते अजित पवार यांनी दिली.

बारामतीत आज माध्यमांशी बोलताना अजित पवार म्हणाले, स्थानिकांना रोजगाराच्या संधी निर्माण करतानाच बारामतीत पर्यटनाच्या दृष्टीनेही कामे सुरु आहेत. केरळ, राजस्थान, कर्नाटक सारख्या राज्यात पर्यटन विकसीत झालेले आहे, बारामतीतही वनविभागामध्ये बोटिंग, गजिबो, पार्किंग, अँडव्हेंचर स्पोर्टस अशा बाबी सुरु होणार आहेत. या शिवाय क-हा नदीचे सुशोभिकरण तसेच नीरा डावा कालव्याचे सुशोभिकरण होत आहे, तीन हत्ती चौक ते पेन्सिल चौकापर्यंत पदपथाचे सुशोभिकरण केले जात आहे. नागरिकांना चार क्षण विरंगुळा मिळावा या उदेदशाने ही कामे मार्गी लावली जात आहेत.

सत्ता असो वा नसो शंभर टक्के सर्वांनाच नोकरी देता येणे शक्य नाही, छोटे मोठे उद्योग सुरु केले तर त्यात नोकरीच्या संधी निर्माण करता येतील, यात स्थानिकांना प्राधान्य देता येईल, त्यातून कुटुंबाचा उदरनिर्वाह होऊ शकतो म्हणून बारामतीच्या परिसरामध्ये अलीकडच्या काळात आम्ही अनेक वेगवेगळ्या प्रकारची काम घेतोय, त्याचा परिणाम येत्या काही काळात दिसून येईल.